2025-yilgi yoshlar oʻrtasida Paraosiyo oʻyinlariga Toshkent ilk bor mezbonlik qiladi. Bu haqda Osiyo Paralimpiya qoʻmitasi prezidenti Majid Rashid tomonidan Oʻzbekiston Milliy paralimpiya qoʻmitasi raisi nomiga yuborilgan xatda maʼlum qilingan.

Joriy yilning may oyida Osiyo Paralimpiya qoʻmitasi prezidenti Majid Rashid Oʻzbekistonga tashrif buyurgan edi. Tashrif doirasida Oʻzbekiston Respublikasi Bosh vazirining oʻrinbosari – turizm va sport vaziri Aziz Abduhakimov faxriy mehmon bilan uchrashib, 2025-yilgi yoshlar oʻrtasida Paraosiyo oʻyinlarini Toshkent shahrida oʻtkazish taklifini ilgari surgan edi.

Kuni kecha Osiyo Paralimpiya qoʻmitasi bu borada oʻzining yakuniy qarorini eʼlon qildi va unga koʻra, 2025-yilgi yoshlar oʻrtasida Paraosiyo oʻyinlari mezbonligi Toshkentga taqdim etildi.

Taʼkidlanishicha, 2025-yilgi yoshlar oʻrtasida IV Paraosiyo oʻyinlarini qabul qilish uchun Osiyo qitʼasining bir qator yetakchi davlatlari daʼvogarlik qilishgan edi. Yakunda Osiyo Paralimpiya qoʻmitasi Toshkent shahri nomzodini qoʻllab-quvvatladi.

Qayd etilishicha, yaqinda Oʻzbekistonga tashrif buyurgan Xalqaro Paralimpiya qoʻmitasi prezidenti Endryu Parsons ham Oʻzbekiston Paralimpiya sport turlari boʻyicha eng nufuzli musobaqalarni qabul qilish salohiyatiga ega ekanligi va yaqin kelajakda Oʻzbekistonda yirik xalqaro musobaqalar oʻtkazilishi mumkinligini taʼkidlab oʻtgan edi.

Maʼlumot uchun, shu paytga qadar hech qaysi davlat tomonidan yoshlar oʻrtasidagi Osiyo va Paraosiyo oʻyinlari ketma-ketlikda oʻtkazilmagan. 2025-yilda Toshkent shahri yoshlar oʻrtasida Osiyo va Paraosiyo oʻyinlariga mezbonlik qiladi.

• O‘zbekiston
• Paralimpiya