Pokiston va Hindiston o‘rtasidagi chegara hududlarida yuzaga kelgan beqaror vaziyat tufayli 8-9-may kunlari HY461/462 reyslari (Toshkent—Laxor—Toshkent yo‘nalishi) majburiy bekor qilinadi. Bu haqda Uzbekistan Airways matbuot xizmati xabar berdi.

Bekor qilingan reys yo‘lovchilari chipta narxini qaytarib olish yoki jarimasiz tarzda boshqa sanalarga qayta bron qilish uchun murojaat qilishlari mumkinligi ta’kidlandi.

Aviakompaniya, shuningdek, Yaqin Sharq va Osiyo-Tinch okeani mintaqasi yo‘nalishlarida parvozlar jadvaliga o‘zgartirishlar kiritilishini ma’lum qildi.

Ta’kidlanishicha, parvozlar xavfsizligini maksimal darajada ta’minlash maqsadida, shuningdek, Pokiston va Hindiston chegarasi yaqinidagi havo hududidan vaqtincha o‘tishga qo‘yilgan cheklovlar sababli Dehli, Mumbay, Bangkok, Kuala Lumpur, Pxuket kabi shaharlar yo‘nalishidagi reyslarning marshrutlari o‘zgartiriladi.

Shaharlar ro‘yxati yangilanishi, marshrutlarga qo‘shimcha tuzatishlar kiritilishi mumkinligi qo‘shimcha qilingan. Dastlabki ma’lumotlarga ko‘ra, uchish vaqti 1,5 soat va yo‘nalishga qarab undan ortiqqa uzayishi mumkin.

• Aviaqatnov
• Toshkent
• Uzbekistan airways