Bugun, 12-noyabr kuni Toshkentda Sambo bo‘yicha kattalar o‘rtasida jahon chempionatiga bag‘ishlangan matbuot anjumani bo‘lib o‘tdi.

Matbuot anjumanida Xalqaro sambo federatsiyasi prezidenti Vasiliy Shestakov, Osiyo sambo uyushmasi prezidenti Alamjon Mullayev, Mintaqaviy federatsiyalar rahbarlari, O‘zbekiston sambo assotsiatsiyasi raisi Alisher Alimov va boshqalar ishtirok etishdi. 

Hisob bo‘yicha 46-marotaba tashkil etilayotgan bahslarda jahonning 50 ga yaqin mamlakatidan 400 nafarga yaqin sambochilar sovrinli o‘rinlar uchun kurash olib borishadi. Musobaqa erkaklar, ayollar va jangovar sambo yo‘nalishida tashkil etiladi. Har bir yo‘nalishda 7 tadan – umumiy hisobda 21 ta vazn toifasida g‘olib va sovrindorlar aniqlanadi. 

–  Xalqaro sambo federatsiyasi qo‘llab-quvvatlovi bilan jahon chempionatini o‘z yurtimizda, Toshkentda o‘tkazishga muvaffaq bo‘lmoqdamiz. Biz jahon chempionatini o‘tkazishga tayyormiz. Bizda yirik musobaqalarni o‘tkazish bo‘yicha tajriba bor, – dedi O‘zbekiston sambo assotsiatsiyasi raisi Alisher Alimov. 

Eslatib o‘tamiz, Toshkentda start oladigan kattalar o‘rtasidagi Sambo bo‘yicha jahon chempionati 14-noyabrga qadar davom etadi.

• Sport