“Kuni kecha ya’ni 26-iyul kuni Toshkent shahrining Yunusobod tumanida joylashgan 110/35/10 KVli “Yunusobod” podstansiyasidan ta’minlanuvchi “Universam-1” va “Universam-2” uzatmalariga ulangan yer osti kabel tarmoqlari “Veolia Energy” MCHJ XK tomonidan olib borilgan yer qazish ishlari natijasida shikastlangan.

Mazkur ishlar “Veolia Energy” MCHJ XK tomonidan tuman elektr ta’minoti korxonasi bilan kelishuvsiz amalga oshirilgan.

Buning natijasida yuqori kuchlanishli kabel tarmog‘ida nosozlik yuzaga kelib, Shahriston taqsimlash punkti bilan “Yunusobod” podstansiyasi oralig‘idagi elektr uzatish tarmoqlari ishdan chiqdi.

Oqibatda tumanning 14 ta MFY hududidagi xonadonlarda elektr ta’minoti vaqtincha to‘xtadi.

Hozirda “Toshkent shahar elektr tarmoqlari” MCHJ tomonidan maxsus tezkor avariya-brigadalari nosozliklarni tezkorlik bilan bartaraf etish ishlarini olib bormoqda.

Elektr ta’minoti ta’mirlash ishlari yakunlangach bosqichma-bosqich tiklanadi” – deya izoh qoldirgan elektr ta’minoti korxonasi o‘z rasmiy press-relizida.

Ammo oradan biroz muddat o‘tib, “Veolia energy” xususiy kompaniyasi bayonot berib, quyidagilarni yozib qoldirgan:

“Ommaviy axborot maydonlarida Toshkent shahri, Amir Temur ko‘chasi, Yunusobod tuman sudi ro‘parasida olib borilgan ishlar mutasaddi tashkilotlar bilan kelishilmasdan amalga oshirilgani va natijada kabel zararlangani haqidagi xabarlar yuzasidan, “Veolia Energy” quyidagilarni ma’lum qiladi:

Ko‘rsatilgan manzildagi ishlar tasdiqlangan Toshkent shahar isitish tizimini kuz-qish mavsumiga tayyorlash dasturi doirasidagi rejali issiqlik tarmoqlarini yangilash jarayonining bir qismidir. Barcha yer osti ishlari rasmiy ruxsatnoma asosida pudratchi tashkilot tomonidan amalga oshirilmoqda.

“Hududiy elektr tarmoqlari” DUK Toshkent filiali va tegishli xizmat tashkilotlari bilan kelishuvlar ishlar boshlanishidan oldin olingan.

Qazish ishlari davomida kabelning shikastlanishi bo‘yicha holat qo‘shimcha ravishda o‘rganiladi. Biroq ishlar mutasaddi idoralarni xabardor qilmasdan va ularning roziligisiz bajarilgani haqidagi da’volarni qat’iyan rad etamiz.

Biz ochiqlik va mas’uliyat tamoyillariga sodiq qolgan holda, yuzaga kelgan holat yuzasidan barcha manfaatdor tomonlar bilan ochiq muloqotga tayyor ekanligini bildiradi”

Ikkala tomon ham mazkur axborotlaridan keyin hali rasmiy xabar berganicha yo‘q.

• Elektr energiyasi
• Elektr stansiya
• Elektronika
• elektr