“So‘nggi oylarda Toshkentda ayrim quruvchilar tomonidan qurilish me’yorlari va qonunchilik talablari buzilishi holatlari ko‘plab aniqlandi. Ba’zilari zarur ruxsat beruvchi hujjatlar, ekspertiza xulosalari va texnik ma’lumotnomalarni olmasdan qurilishni boshlab, fuqarolarga noqonuniy ravishda uy-joy sotishga urinishgan.

Bunday xatti-harakatlar natijasida ayrim yurtdoshlarimiz vijdonsiz kompaniyalarga ishonib, jamg‘armalarini yo‘qotib, uy-joysiz qolmoqda.

Toshkent shahar hokimligi vakolatli tuzilmalar bilan hamkorlikda bu masalada qat’iy va prinsipial pozitsiyani egallagan. Poytaxtning bir qator tumanlarida to‘liq hujjatlar to‘plamiga ega bo‘lmagan 59 ta obyektda qurilish ishlari butunlay to‘xtatildi, obyektlar elektr ta’minotidan uzib qo‘yildi. Qurilish maydonlarida nazorat va monitoring ishlari davom ettirilmoqda, har bir qonunbuzarlik holati bo‘yicha qonuniy choralar ko‘riladi.

Hurmatli poytaxt aholisi! Uy-joy xarid qilishda nihoyatda ehtiyotkor bo‘ling:

- sotib olayotgan ko‘chmas mulkka oid barcha hujjatlarning asl nusxalarini (kadastr, ekspertiza xulosalari va kengash qarorlari, texnik ko‘rik dalolatnomasi) talab qiling va ularni sinchkovlik bilan tekshiring;

- sotuvchilarga pulni naqd yoki norasmiy yo‘llar bilan bermang, shartnomaning barcha bandlarini diqqat bilan o‘rganib chiqing;

- quruvchi yoki obyektning qonuniyligi xususida ozgina shubha tug‘ilsa, shuningdek, kompaniya hujjatlarni taqdim etishni paysalga solsa, Toshkent shahar hokimligining rasmiy botiga murojaat eting. Sizga obyektning qonuniy maqomi haqida ma’lumot beriladi.

Hurmatli tadbirkorlar va quruvchilar! Qurilish yoki savdo faoliyatini boshlashdan avval, barcha zarur hujjatlarni rasmiylashtirib oling. Toshkent shahar hokimligi qurilish talablarining har qanday buzilishiga va fuqarolar manfaatlariga zarar yetkazuvchi harakatlarga nisbatan qat’iy va murosasiz choralar ko‘radi.

Hokimlikning asosiy vazifasi - poytaxt aholisining xavfsizligi, osoyishtaligi va qonuniy, qulay hamda xavfsiz uy-joyga ega bo‘lish huquqini himoya qilishdir” – deyiladi poytaxt hokimligining rasmiy xabarida.

• Hokimlik
• Poytaxt
• Toshkent
• rasmiy munosabat