Qatarda bo‘lib o‘tgan Islom hamkorlik tashkiloti va Arab davlatlari ligasi qo‘shma sammitida so‘zga chiqqan Turkiya prezidenti Rajab Toyyib Erdo‘g‘an Isroilning mintaqadagi harakatlari barqarorlikka xavf solayotganini ta’kidladi. Unga ko‘ra, ayrim davlatlarning Falastinni tan olish tashabbusi ijobiy qadam bo‘lsa-da, u sanksiyalar bilan mustahkamlanmasa, samarasiz bo‘lib qoladi.

Turkiya rahbariga ko‘ra, Islom dunyosi Isroilga qarshi choralarni kuchaytirishi, diplomatik harakatlarni jadallashtirishi va xalqaro huquq mexanizmlari orqali uni sud oldida javobgarlikka tortishi zarur.

“Isroil faqat kuchli reaksiya va sanksiyalar orqali to‘xtatilishi mumkin, aks holda bosqinchilik va beqarorlik siyosatini yanada tezlashtiradi”, — degan u.

Erdo‘g‘an iqtisodiy bosim o‘tkazish zarurligini ham qayd etgan. Uning ta’kidlashicha, ayrim sohalarda o‘z-o‘zini ta’minlash, ayniqsa mudofaa sanoatida, ustuvor vazifa bo‘lishi kerak.

“Turkiya sizlar bilan tajribamiz va imkoniyatlarimizni bo‘lishishga tayyor. Biz bir yarim yil oldin Isroil bilan barcha savdo aloqalarini to‘xtatdik va yillik 9,5 mlrd dollardan voz kechdik”, — degan Erdo‘g‘an.

• Erdogʻan
• Isroil
• Sanksiya
• Turkiya