Kecha, 17-sentyabr kuni Qirg‘iziston Prezidenti Sadir Japarov “Jalolobod viloyatidagi Jalolobod shahrini Manas deb o‘zgartirish to‘g‘risida”gi qonunni imzoladi. Bu haqda Qirg‘iziston rahbarining matbuot xizmati xabar berdi.

Ma’lum qilinishicha, shahar nomini o‘zgartirish to‘g‘risidagi qonunni mamlakat parlamenti shu yilning 10-sentyabr kuni qabul qilgan.

“Qonunning maqsadi – milliy mafkurani mustahkamlash, Jalolobod shahriga buyuk Manas – qirg‘iz xalqining turli bosqinlardan himoyachisi, xalq qahramonining nomini berish”, – deyiladi xabarda.

10-sentyabr kuni Qirg‘iziston parlamenti majlisida deputat Mirlan Samixo‘ja “Manas” qirg‘izlar uchun bosh epos, buyuk meros va ruh ekanini ta’kidlagan.

“Shu sababli uning nomini oladigan shahar zimmasiga juda katta mas’uliyat tushadi – yetti, o‘n baravar ko‘p. Aholi bu nomga munosib bo‘lishi kerak. Shuning uchun internetda bunday narsalar bo‘lmasligi lozim: Manasning fohishalari, Manasning korrupsionerlari, Manasning zo‘ravonlari. Bunday so‘zlar ehtiyotkorlik bilan ishlatilishi kerak, qonunni buzib, bunday yomon ishlarni qiladiganlar u yerda umuman bo‘lmasligi kerak. Shahar aholisi ibrat ko‘rsatishi va Manasning obro‘sini oshirishi lozim”, – degan deputat.

Ma’lumot uchun, Jalolobod shahri 1877-yil oktyabrda rasman aholi punkti sifatida tashkil etilgan bo‘lib, bugungi kunda shahar aholisining 30 foizga yaqini o‘zbeklardan iborat.

• Japarov
• Qirg‘iziston
• Qonun