Joriy yilning 10-oktyabr kuni soat 19:00 da O‘zbekiston va Eron terma jamoalari futbol bo‘yicha Jahon chempionati saralash bahslari doirasida o‘zaro uchrashishadi.

Toshkent shahar IIB esa O‘zbekiston – Eron o‘yiniga kelmoqchi bo‘lgan muxlislarga murojaat qildi.

Chiptasi bor muxlislarga imkon qadar vaqtliroq yo‘lga chiqib, shaxsiy avtomobilda emas, jamoat transportida kelish tavsiya etiladi.

Shuningdek, IIBB stadionga chiptasiz kelmaslikni so‘radi.

“iticket.uz sayti ma’lumotiga ko‘ra, o‘yinga bo‘lgan qiziqish yuqori bo‘lganligi sababli sotuvga chiqarilgan barcha chiptalar tugagan.

 O‘yinni yuqori darajada o‘tkazish maqsadida jamoat tartibini saqlash va fuqarolar xavfsizligini ta’minlash uchun Toshkent shahar IIBB va Milliy gvardiya xodimlari tomonidan tegishli chora-tadbirlar ko‘rilgan.

 Hurmatli fuqarolar! Sizlardan stadionga o‘yin boshlanishidan vaqtliroq tashrif buyurishingizni, shaxsiy transportingizda emas, balki jamoat transportida kelishingizni, chiptalarsiz o‘yingohga kelmasligingizni (chiptalarsiz kiritilmaydi) so‘rab qolamiz. Futbol ishqibozlariga qulaylik yaratish va tirbandliklarga yo‘l qo‘ymaslik maqsadida qo‘shimcha jamoat transportlari ajratilganligini ma’lum qilamiz.

Shuningdek, futbol ishqibozlari stadionda jamoat tartibiga va o‘rnatilgan qoidalarga qat’iy rioya qilishlarini, muxlislik madaniyatiga amal qilishlarini so‘raymiz”, – deyiladi murojaatda.

• Eron
• Futbol
• IIB