Davlat xizmatini rivojlantirish agentligining vacancy.argos.uz sayti orqali Toshkent shahri hamda Fargʻona viloyati Ekologiya va atrof-muhitni muhofaza qilish boshqarmasi boshligʻi lavozimlariga yangi rahbarlar tayinlandi.

Joriy yilning 11-oktyabr kuni Davlat ekologiya qoʻmitasi tomonidan Oʻzbekiston Respublikasi Prezidenti huzuridagi Davlat xizmatini rivojlantirish agentligining vacancy.argos.uz sayti orqali Toshkent shahar Ekologiya va atrof-muhitni muhofaza qilish boshqarmasi boshligʻi lavozimi boʻyicha ochiq tanlov eʼlon qilingan.

Ushbu tanlov yakuni boʻyicha oʻtkazilgan test natijalariga koʻra, Dexkanov Farxod Ergashboyevich nomzodlar ichida eng yuqori 82,5 ballni toʻplab, Davlat ekologiya qoʻmitasi Tanlov komissiyasi tomonidan oʻtkazilgan suhbat jarayonlarida ijobiy koʻrsatkichlarni egallab, mazkur lavozimga tayinlangan.

Bu lavozimga tayinlangunga qadar F.Dexkanov Toshkent shahar Ekologiya va atrof-muhitni muhofaza qilish boshqarmasi boshligʻi birinchi oʻrinbosari lavozimida mehnat faoliyatini olib borgan.

Xuddi shunday, mazkur lavozimning Fargʻona viloyati Ekologiya va atrof-muhitni muhofaza qilish boshqarmasi uchun eʼlon qilingan, 11-oktyabr kungi ochiq tanlov yakunlari boʻyicha oʻtkazilgan test natijalariga binoan, nomzodlar ichida Jumanov Baxromjon Azimovich eng yuqori 80 ballni toʻplab, 2021-yilning 8-noyabr kunidan Fargʻona viloyati Ekologiya va atrof-muhitni muhofaza qilish boshqarmasi boshligʻi lavozimiga tayinlangan.

Qayd etilishicha, mazkur lavozimga tayinlangunga qadar B.Jumanov Davlat ekologiya qoʻmitasi huzuridagi “Davlat ekologik sertifikatlashtirish va standartlashtirish markazi” DUK direktori oʻrinbosari lavozimida mehnat faoliyatini olib borgan.

• Ekologiya
• Toshkent