Toshkent va Farg‘onada o‘qishga kiritib qo‘yishni va’da qilgan firibgarlar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamentining matbuot xizmati xabar berdi.

Qayd etilishicha, Bosh prokuratura huzuridagi Departamentning Yangihayot tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda, fuqaro S.I. fuqaro M.A.ni go‘yoki yuqori lavozimda ishlovchi tanishlari yordamida Toshkent davlat iqtisodiyot universitetiga o‘qishga kiritib qo‘yishi evaziga 4 000 AQSh dollarini olgan vaqtida ashyoviy dalillar bilan ushlangan.

Shuningdek, Departamentning Farg‘ona shahar bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda fuqaro M.S. va Marg‘ilon shahridagi Abu Ali ibn Sino nomidagi Jamoat salomatligi texnikumi kadrlar bo‘yicha inspektori M.Sh. fuqaro F.A.ni ushbu texnikumga o‘qishga kiritib qo‘yish evaziga 400 AQSh dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Farg‘ona
• Firibgarlik
• Pora
• Toshkent