Dunyo axborot agentligi xabariga ko‘ra, O‘zbekiston diplomatlari Vaslav Gavel nomidagi Praga xalqaro aeroportining yo‘nalishlarni rivojlantirish bo‘yicha menejeri Martin Tatek bilan onlayn uchrashuv o‘tkazdi.

Muzokaralarda sayyohlar va ishbilarmonlar oqimini oshirish, aviatsiya sohasidagi hamkorlikni kengaytirish masalalari muhokama qilindi. Chexiya fuqarolari uchun vizasiz rejim joriy etilgani, shuningdek, O‘zbekiston fuqarolariga turistik vizalar berish jarayoni ijobiy dinamika ko‘rsatayotgani qayd etildi.

Martin Tatek O‘zbekistonning madaniy-tarixiy turizm salohiyati chexiyalik sayyohlar uchun jozibador ekanini ta’kidladi. Uning so‘zlariga ko‘ra, mamlakatimizning boy madaniy merosi, tarixiy obidalari va yaratilgan qulay sharoitlar sayyohlarda katta taassurot uyg‘otmoqda. Shuningdek, O‘zbekiston Chexiya ishbilarmon doiralari uchun istiqbolli yo‘nalish sifatida baholanayotgani bildirildi.

Tomonlar to‘g‘ridan-to‘g‘ri muntazam aviaqatnovlarni yo‘lga qo‘yish turizm va biznes aloqalarini rivojlantirishda muhim omil bo‘lishini ta’kidladi. Hozirda yo‘lovchilarning aksariyati tranzit reyslardan, asosan Istanbul orqali foydalanayotgani, bu esa yo‘nalish raqobatbardoshligiga ta’sir qilayotgani aytildi. Praga–Toshkent o‘rtasida to‘g‘ridan-to‘g‘ri reyslarning yo‘lga qo‘yilishi turoperatorlar va individual sayyohlar uchun safarlarni oldindan rejalashtirish, turpaketlar shakllantirish hamda marketing ishlarini samarali olib borish imkonini beradi.

Chexiya tomoni “Uzbekistan Airways”ni asosiy salohiyatli hamkor sifatida qayd etdi. Parvozlarni yo‘lga qo‘yish masalasini muhokama qilish uchun mart oyi boshida Praga aeroporti, milliy aviakompaniya hamda manfaatdor xususiy tashuvchilar ishtirokida qo‘shimcha onlayn uchrashuv o‘tkazish rejalashtirilgan. Unda muntazam qatnovlarni tashkil etish shartlari va rag‘batlantirish mexanizmlari ko‘rib chiqiladi.

• Aviaqatnov
• Chexiya
• Muzokara
• Toshkent