2023-yil 4-mart kuni Saudiya Arabistonining “ACWA Power” kompaniyasi, Oʻzbekiston Respublikasi Investitsiyalar, sanoat va savdo vazirligi va “Oʻzbekiston milliy elektr tarmoqlari” aksiyadorlik jamiyati oʻrtasida investitsiya va elektr energiyasini sotib olish toʻgʻrisida uchta bitim imzolandi.

Bitimlar Toshkent va Samarqand viloyatlarida umumiy quvvati 1 400 MVt boʻlgan ikkita quyosh fotoelektr stansiyasi hamda Toshkent, Buxoro va Samarqand viloyatlarida umumiy quvvati 1 200 MVt boʻlgan uchta energiya saqlash tizimlari joriy etilishini oʻz ichiga oladi.

Tadbir davomida Toshkent viloyatida quvvati 400 MVt boʻlgan yirik quyosh fotoelektr stansiyasi qurilishiga start berildi.

Ushbu elektr stansiyasi ishga tushirilishi natijasida yiliga 900 mln kVt·soat elektr energiyasi ishlab chiqariladi.

Buning natijasida 257 mln. kub metr tabiiy gaz tejalishiga erishilib, atmosferaga 360 ming tonna zararli gazlar chiqishining oldi olinadi.

Qayd etilishicha, Respublikamizda 2030-yilga borib elektr energiyasining 35 foizini qayta tiklanuvchi energiya manbalari hisobidan ishlab chiqarish maqsad qilingan.

Buning natijasida esa, jami 15 000 MVtni – 10 000 MVt quyosh va 5 000 MVt shamol elektr stansiyalari ishga tushirilishi belgilangan.

Maʼlum qilinishicha, ushbu loyihalar ishga tushgach, respublika hududlaridagi 1,2 million xonadonni elektr energiyasi bilan taʼminlash va yiliga 1,6 million tonnaga yaqin zararli gazlar chiqishining oldini olishga erishiladi

Investitsiya bitimlari Oʻzbekiston Investitsiyalar, sanoat va savdo vazirligi va “ACWA Power” kompaniyasi hamda elektr energiyasini sotib olish toʻgʻrisidagi bitimlar “Oʻzbekiston milliy elektr tarmoqlari” AJ tomonidan imzolandi.

Toshkent, Samarqand va Buxoro viloyatlarida amalga oshirilayotgan loyihalar 10 milliard dollarlik maqsadli investitsiyalar doirasida qariyb 2,5 milliard dollar boʻlgan yangi investitsiyalarni jalb qiladi.

• Elektr energiyasi
• Energetika_vazirligi
• Samarqand
• Toshkent