Toshkent viloyati Ekologiya va atrof-muhitni muhofaza qilish boshqarmasi boshlig‘i Baxtiyor Jo‘rayev egallab turgan lavozimidan ozod etildi. Bu haqda qo‘mita Matbuot xizmati ma’lum qildi.

Qayd etilishicha, joriy yil 16-dekabr kuni Ekologiya va atrof-muhitni muhofaza qilish davlat qo‘mitasining videoselektor tarzidagi navbatdagi yig‘ilishi bo‘lib o‘tgan. Yig‘ilishga raislik qilgan qo‘mita raisi o‘rinbosari Islomjon Boqijonov qo‘mita tizimida murojaatlar bilan ishlash holati tanqidiy tahlil qilingan.

Shuningdek, kun tartibidagi masala yuzasidan hududiy boshqarmalar rahbarlarining hisobotlari tinglangan.

Xabarda aytilishicha, jismoniy va yuridik shaxslar tomonidan asosan chiqindi tashlanishi yoki ularning vaqtida olib ketilmasligi, o‘simlik dunyosiga yetkazilayotgan zararlar, korxona va tashkilotlarning atrof-muhitni ifloslantirishi, yer va suv resurslaridan oqilona foydalanishga oid masalalar tashkil etadi.

Yig‘ilishda murojaatlarni ko‘rib chiqishda sustkashlikka yo‘l qo‘ygan 14 nafar mas’ulga nisbatan “xayfsan” intizomiy jazo chorasi qo‘llanilgani ma’lum qilindi.

Toshkent viloyati Ekologiya va atrof-muhitni muhofaza qilish boshqarmasi boshlig‘i Baxtiyor Jo‘rayevning ishdan olinishiga eng ko‘p murojaatlar Toshkent viloyatiga to‘g‘ri kelgani (710 ta yoki jami murojaatlarning 15 foizi) va aksariyatining yechimi belgilangan muddatida ta’minlanmagani, shuningdek, ushbu viloyatda ekologiya sohasiga oid masalalarni ko‘rib chiqishda tizimli kamchiliklarga yo‘l qo‘yilayotgani, bunga birinchi navbatda boshqarma boshlig‘ining mas’uliyatsizligi sabab bo‘layotganini sabab sifatida ko‘rsatib o‘tildi.

• Ekologiya
• Toshkent