Toshkent viloyatining Qozog‘iston bilan chegara hududida noqonuniy yerosti yo‘li (tunnel) aniqlandi va Hindistonda ishlab chiqarilgan 1 mlrd so‘mlik dori vositalari olindi.

Davlat xavfsizlik xizmati xodimlari tomonidan Chegara qo‘shinlari va “Toshkent-Aero” IBK harbiy xizmatchilari bilan hamkorlikda o‘tkazilgan tezkor tadbirda, Hindistondan Qozog‘iston orqali mamlakatimizga katta miqdordagi, sifati kafolatlanmagan dori vositalarini noqonuniy olib kelish bilan shug‘ullangan transchegaraviy jinoiy guruh faoliyati fosh etildi.

Qayd etilishicha, jinoiy guruh tomonidan navbatdagi dori vositalari “Dehli-Toshkent-Olmaota” aviayo‘nalishi orqali tranzit tarzda “Olmaota” xalqaro aeroportiga olib kelinib, Qozog‘istonning Turkiston viloyati Sariyog‘och tumani “Do‘stlik” aholi yashash punktiga yetkazilgan va yashirin yerosti yo‘li orqali Toshkent viloyatining Toshkent tumani “O‘rikzor” MFY hududiga o‘tkazilgan.

Tezkor tadbir davomida jinoiy guruh a’zolaridan jami 1 mlrd 94 mln 342 ming so‘mlik, Hindistonda ishlab chiqarilgan Albumin, Remdesivir, Meropenem kabi jami 107 nomdagi 17048 dona dori vositalari ashyoviy dalil sifatida rasmiylashtirib olingan.

Ta’kidlash lozimki, ushbu yerosti yo‘lining uzunligi 310 metrni tashkil etadi. Shuningdek, yerosti yo‘li havo ventilyatsiyasi, yoritish tizimi, yuklarni tashishga mo‘ljallangan aravalar va arqonlar bilan jihozlangan.

Hozirda holat yuzasidan jinoiy guruh a’zolariga nisbatan Jinoyat Kodeksining tegishli moddalari bilan jinoyat ishi qo‘zg‘atilib, qamoq ehtiyot chorasi qo‘llanilgan.

• Chegara
• Qozog‘iston
• Toshkent viloyati
• Tunnel