Toshkent viloyati Ichki ishlar bosh boshqarmasi probatsiya bo‘limi hisobida turuvchi 2398 nafardan ortiq mahbus muddatidan avval ozod qilindi. Bu haqida viloyat IIBB axborot xizmati ma’lum qildi.

Ma’lum qilinishicha, 2021-yil davomida Toshkent viloyati IIBB probatsiya bo‘limi hisobida turuvchi nazoratdagi shaxslar bilan o‘tkazilgan profilaktik tadbir va sayyor sudlarda mehnatga to‘g‘ri munosabatda bo‘lgan, cheklovlarga to‘liq rioya etgan 2398 nafar nazoratdagi shaxsning jazosi muddatidan ilgari shartli tugatilgan.

Ma’lumotlarga ko‘ra,  ozod qilingan shaxslarni ijtimoiy hayotga moslashtirish bo‘yicha 134 marta mehnat yarmarkasi tashkil etilib, unda 14 ming 343 nafar shaxsga ishga qabul qilish bo‘yicha yo‘llanma berilgan hamda 3793 nafari ishga joylashtirilgan.

Bundan tashqari, 422 kishi kasbga yo‘naltirish bo‘yicha bepul o‘quv kurslariga borishi ta’minlanib, 220 nafari qayta kasbga yo‘naltirish bo‘yicha o‘qitilgan. Olib borilgan chora-tadbirlarga sud tomonidan belgilangan cheklovlarga amal qilmay, jazoni o‘tashdan bo‘yin tovlagani uchun 155 nafar shaxs ozodlikdan mahrum qilish joyiga qaytarilgan.

Eslatib o‘tamiz, avvalroq O‘zbekistonda xalqaro diniy erkinlik bo‘yicha 2020-yil hisoboti e’lon qilinib, yil davomida din bilan bog‘liq jinoyatlari uchun hibsga olingan 243 nafar mahbus ozod etilgan edi.

• IIBB
• Toshkent