Davlat ekologiya qo‘mitasi Toshkent shahri Yunusobod tumani Otchopar mahallasidagi  daraxtlarning noqonuniy kesilishi bilan bog‘liq holatni “tabiatga xiyonat” deb atadi.

Qo‘mita bergan ma’lumotga ko‘ra, Toshkent shahri Yunusobod tumanidagi Amir Temur va Chinobod ko‘chalari chorrahasi yonidagi bir necha sotixlik joyda 18 dona eldor qarag‘ayi mavjud bo‘lib, ushbu yerni auksion orqali qo‘lga kiritgan fuqaro daraxtlarni boshqa joyga ko‘chirishga ruxsat berishni so‘rab Toshkent shahar Ekoboshqarmasiga murojaat qilgan.

Toshkent shahar Ekologiya va atrof-muhitni muhofaza qilish boshqarmasi bunga rad javobini bergandan keyin esa daraxtlar sirli tarzda kesib ketila boshlangan.

Dastlab noma’lum kimsalar tomonidan tunda 10 ta daraxt yarmigacha arralab ketilgan. Ekologlar esa ushbu daraxtlarni quritmasdan saqlab qolish maqsadida Botanika instituti mutaxassislarini jalb qilib, agrotexnik tadbirlarni olib borishgan va ularni asrab qolish choralarini ko‘rishgan.

Ammo, ma’lum vaqtdan keyin noma’lum shaxslar qora niqobda kelishib, kechasi 4 ta daraxtni kesib, voqea joyidan qochib qolishadi.

Aniqlanishicha, yerning egasi J.G. daraxtni ko‘chirishga ruxsat bermagan ekologlar ustidan huquqni muhofaza qilish organlariga shikoyat yo‘llagan. U daraxt ko‘chirilishiga ruxsat berilmagani tufayli uning huquqlari buzilganini aytgan. Sud esa ushbu arizani qanoatlantirishni rad etgan.

Hozirgi kunda mazkur holat bo‘yicha tuzilgan maxsus ishchi guruhi qayd etilgan manzilda batafsil o‘rganish ishlarini o‘tkazib, sodir bo‘lgan holatga qonuniy baho berish uchun to‘plangan hujjatlarni Yunusobod tuman prokuraturasiga topshirdi. Tunda daraxtlarga atayin shikast yetkazayotganlarni topish maqsadida ichki ishlar organlari bilan hamkorlikda rejali tadbirlar amalga oshirilmoqda.

Eslatib o‘tamiz, avvalroq o‘rmon fondiga kirmaydigan daraxtlarning kesilishiga joriy etilgan moratoriy muddatsiz davrga uzaytirilgan edi.

• Ekologiya
• Toshkent