Joriy yilning 13-yanvar kuni, “12-Avtobus saroyi” filiali tasarrufidagi 117-sonli yo‘nalishdagi avtobus old eshigi ochiq holatda harakatlangani aks etgan video ijtimoiy tarmoqqa joylashtirilgan.

Mazkur holat yuzasidan “Toshshahartransxizmat” AJ quyidagilarni ma’lum qiladi:

Joriy yilning 13-dekabr kuni, “12-Avtobus saroyi” filiali tasarrufidagi “ISUZU-HC 40” rusumli, davlat raqami “01 883 WYeA”, saroy raqami 404-bo‘lgan 117-sonli yo‘nalishdagi avtobus haydovchisi B.A. Qo‘yliq bozoridan Do‘stlik 2-mavzesi tomon harakatlanayotgan vaqtda, bugungi kunda kuzatilayotgan anomal sovuq ob-havo harorati tufayli, oraliq bekatda avtobus eshigining mexanizmidagi havo tizimi muzlab qolgan.

“Haydovchi avtobus salonida yo‘lovchilar borligini inobatga olgan holda, ularni oxirgi bekatga yetkazib qo‘yish maqsadida harakatni davom ettirgan. Yo‘lovchilarni bekatga yetkazgandan so‘ng haydovchi avtobusni soat 14:20 da “12-Avtobus saroyi” filialiga olib kirgan. Avtobusga texnik yordam ko‘rsatilib, kamchilik bartaraf etilgandan so‘ng soat 15:20 da yana yo‘nalishga chiqarilganligini va ushbu avtobus ayni paytda yo‘nalishda texnik soz holatda harakatini davom ettirayotganligini ma’lum qilamiz”, – deyiladi xabarda.

Ta’kidlanishicha, “Toshshahartransxizmat” AJ tomonidan barcha avtobus saroyi mutasaddi rahbarlariga tegishli ko‘rsatmalar berilib, har shanba kuni bo‘lib o‘tadigan “Haydovchilar kuni” yig‘ilishida haydovchi va chiptachilarga favqulodda holatlar yuzaga kelgan vaqtda qanday harakatlanish zarurligi bo‘yicha yana bir bor tushuntirish ishlarini olib borish zarurligi to‘g‘risida topshiriqlar berilgan.

• Avtobus
• Toshshahartrans