Toshkent shahrining Olmazor tumanida yo‘lovchi avtobusi piyodani bosib ketdi. Bu haqida “Toshshahartransxizmat” AJ axborot xizmati xabar berdi.

Ma’lum qilinishicha, voqea 6-yanvar kuni soat 19:50 larda “8-Avtobus saroyi” tasarrufidagi saroy raqami 321 bo‘lgan, Isuzu rusumli, avtobus haydovchisi O.B 43-sonli yo‘nalishda avtobusni Usta Shirin ko‘chasi bo‘ylab boshqarib borayotib, Jomiy qurilish bozori oldidagi svetoforda to‘xtash uchun sekinlashayotgan vaqtida, yo‘l qatnov qismining birinchi bo‘lagida harakatlanayotgan piyoda to‘satdan avtobus tomonga muvozanatini yo‘qotib yiqilgan va yo‘l-transport hodisasi sodir bo‘lgan.

Natijada piyoda voqea joyida vafot etgan. Dastlabki xulosaga ko‘ra piyoda mast holatda bo‘lgan.
“Hozirda mazkur yo‘l-transport hodisasi bo‘yicha Toshkent shahar ichki ishlar bosh boshqarmasi tomonidan dastlabki tergov ishlari olib borilmoqda. “Toshshahartransxizmat” AJning Harakat xavfsizligini nazorat etish bo‘limi tomonidan xizmat surishtiruvi o‘tkaziladi”, - deyiladi xabarda.

• Avtobus
• Toshkent