Toshkentda elektr ta’minogida kiritilgan cheklovlar 16-dekabr sanasiga qadar amal qiladi. Bu haqda “Hududiy elektr tarmoqlari”ning ma’tbuot xizmati xabar berdi.

Qayd etilishicha, cheklovlar havo haroratining sovib ketishi hamda yuqori iste’mol vaqtlarida Toshkent shahriga belgilangan iste’mol topshirig‘ini bajarish, ishlab chiqarishdagi texnologik jarayonlar to‘xtab qolishining oldini olish, elektr energiyasi ishlab chiqarish va iste’mol muvozanatini ushlab turish hamda ta’minotdagi tartibsiz uzilishlarni bartaraf etish maqsadida amalga oshirilmoqda.

“Poytaxt hududlarida tuman hokimliklari bilan kelishgan holda avval e’lon qilingan elektr energiyasi ta’minotiga oid kiritilgan qisqa muddatli cheklovlar dekabr oyining 14, 15 hamda 16 sanalarida ham amal qilishini ma’lum qilamiz”, deyiladi xabarda.

Avvalroq Energetika vazirligi O‘zbekistonda elektr ta’minotida rejali cheklovlar kiritilishini ma’lum qilgani haqida xabar berilgandi.

• Elektr energiyasi
• cheklov