Toshkent shahrida bo‘lib o‘tayotgan EPS-Topik test imtihoniga maxsus vosita olib kirmoqchi bo‘lgan shaxs aniqlandi va qo‘lga olindi. Bu haqda Tashqi mehnat migrasiyasi agentligi matbuot xizmati xabar berdi.

Qayd etilishicha, Koreya Respublikasida ishlash istagidagi fuqarolar uchun Toshkent shahrida bo‘lib o‘tayotgan EPS-Topik test imtihonlarida boshqa fuqaro o‘rniga testga kirish va testda qo‘shimcha vositalardan foydalanishga uringanlar jazolanishi haqida ogohlantirilgan.

Ammo, shunga qaramay, test topshirish uchun ro‘yxatdan o‘tgan fuqaro F.A. maxsus vositani testga olib kirishga uringan. U shu paytda Bandlik va mehnat munosabatlari vazirligi va Tashqi mehnat migrasiyasi agentligi xodimlari tomonidan ushlab qolingan.

Xabarga ko‘ra, ushbu holat bayonlashtirilib, tegishli tashkilotlarga taqdim etilgan. Test imtihoni qoidalarini buzgan fuqaro 3 yil davomida ushbu imtihonda qatnashish imkoniyatidan mahrum bo‘lishi hamda qonunchilikda belgilangan javobgarlikka tortilishi mumkin.

• Migratsiya