Toshkentda bank xizmatlari markaziga uyushtirilgan bosqinchilik harakati yuzasidan maʼlumot berildi.

Ma’lum qilinishicha, 18-aprel kuni soat 16:30 dan 17:00 gacha boʻlgan vaqt oraligʻida “Trastbank” xususiy aksiyadorlik bankining Yunusobod tumani Moyqoʻrgʻon koʻchasi, 39-uyda joylashgan “Turkiston” bank xizmatlari markaziga nomaʼlum shaxs tomonidan hujum uyushtirilgan.

Ushbu shaxs qora niqob kiygan holda dastasi qora izolyatsion lenta bilan oʻralgan soxta quroldan foydalanib, bosqinchilik harakatini amalga oshirmoqchi boʻlgan.

Biroq bank xodimlari tomonidan yuborilgan favqulodda qoʻngʻiroq asosida zudlik bilan hodisa joyiga IIV Qoʻriqlash xizmati xodimlari yetib kelib, bosqinchilik harakatini bartaraf etgan va gumondor shaxsni qoʻlga olgan.

Hodisa oqibatida yuqoridagi shaxs tomonidan bank xizmatlari markazi binosining kirish eshigi oynasiga shikast yetkazilgan. “Bank xodimlari va mijozlariga hamda BXM kassasida mavjud boʻlgan pul mablagʻlariga hech qanday ziyon yetkazilmagan. Hozirda huquqni muhofaza qiluvchi organlar tomonidan tergovga qadar surishtiruv ishlari olib borilmoqda”, — deyiladi xabarda.

• Bank
• Toshkent