Toshkentda xonadon egasi mehmonini shisha idish bilan urib o‘ldirib qo‘ydi. Bu haqda IIV huzuridagi Tergov departamenti xabar bermoqda.

Vojea 7-yanvar kuni soat 11:00 larda Shayxontohur tumani Tinchlik mahallasi G.Uzoqov ko‘chasidagi xonadonda sodir bo‘lgan. 38 yoshli S.R. va tanishi 38 yoshli K.A.lar birgalikda “Rojdestvo” bayramini nishonlashmoqchi bo‘lishgan. Shu maqsadida spirtli ichimliklar sotib olishib, S.R.ning xonadonida ularni ichishib, o‘zaro kelishmovchilik natijasida janjallashib qolishadi.

Shu payt xonadon egasi S.R. tanishining boshiga qo‘lida bo‘lgan shisha idish bilan bir marotaba urib, unga tan jarohati yetkazgan. Natijada K.A. tez-tibbiy yordam kelguniga qadar “bosh chap tomon chakka sohasi tan jarohati” bilan hodisa joyida vafot etgan.

Mazkur holat yuzasidan Shayxontohur tumani IIO FMB huzuridagi Tergov bo‘limi tomonidan Jinoyat kodeksning 104-moddasi 3-qismi “D” bandi (qasddan badanga og‘ir shikast yetkazish) bilan jinoyat ishi qo‘zg‘atilib, S.R. gumon qilinuvchi tariqasida jinoyat ishida ishtirok etishga jalb qilinib, prosessual tartibda ushlangan.

Tergov davomida, jinoyatning kelib chiqish sababi o‘rganilganda, shu kuni gumon qilinuvchining uyiga mehmonga kelgan tanishi, uning turmush o‘rtog‘i to‘g‘risida aytgan gaplaridan jahli chiqib, o‘zining qo‘lida bo‘lgan shisha idish bilan K.A.ning bosh chakka qismiga urganligi aniqlangan.

Tergov davom etmoqda.

Ta’kidlanishicha, bu turdagi jinoyatlar uchun Jinoyat kodeksining normalariga ko‘ra, 8 yildan 10 yilgacha ozodlikdan mahrum qilish jazosi belgilangan.

• IIB
• Qotillik