Toshkent shahrining Chilonzor tumanida fuqaroning avtoturargoh foydalanuvchilaridan noqonuniy to‘lov undirib kelganlik holatiga chek qo‘yildi. Bu haqda Chilonzor tuman hokimligi matbuot xizmati xabar berdi.

Ma’lum bo‘lishicha, ijtimoiy tarmoqlar orqali “Chilonzor” metrobekati yonidagi aholi bepul foydalanadigan avtoturargoh noqonuniy ravishda pulli avtoturargohga aylantirilgani haqidagi murojaat chop etilgan.

Murojaatda ko‘rsatilgan manzil tuman hokimligi mutasaddilari tomonidan borib o‘rganilgan. O‘rganishlar jarayonida fuqaro mazkur avtoturargohni o‘zboshimchalik bilan pulli avtoturargohga aylantirib olgani ma’lum bo‘lgan.

Tuman hokimligi mas’ullari tomonidan ushbu fuqaroga noqonuniy xatti-harakatlari uchun qonun doirasida javobgarlik borligi tushuntirilib, uning noqonuniy faoliyatiga chek qo‘yilgan va avtoturargohdan aholi to‘lovsiz foydalanadigan bo‘lgan.

• Avtoturargoh
• Toshkent