Ijtimoiy tarmoqlarda ikki nafar shaxsning begona insonning uyiga kirib, urib tan jarohati yetkazganligi aks etgan video yuzasidan IIV izoh berdi.

Qayd etilishicha, joriy yilning 2 noyabr kuni 1999 yilda tug‘ilgan Islom M., 2000 yilda tug‘ilgan Akmal R. va 2005 yilda tug‘ilgan Fotix K. oldindan tanishi bo‘lgan 1993 yilda tug‘ilgan D.M. bilan o‘zaro og‘zaki janjallashib qolishgan. So‘ng shu kuni taxminan soat 21:00 da ular Shayxontohur tumanidagi D.M. istiqomat qilayotgan xonadonga turar joy daxlsizlgini buzib kirib, uni urib tan jarohati yetkazishgan. Mazkur jarayonni 2005 yilda tug‘ilgan Fotix K. video tasvirga olgan, so‘ng ijtimoiy tarmoqlarda layk yig‘ish maqsadida tarqatib yuborgan.

Yuqorida qayd etilgan holat yuzasidan Shayxontohur tumani IIO Faoliyatini muvofiqlashtirish boshqarmasi Tergov bo‘limi tomonidan O‘zbekiston Respublikasi Jinoyat kodeksining 105-moddasi (“Qasddan badanga o‘rtacha og‘ir shikast yetkazish”) va 142-moddasi (“Fuqarolarning turar joyi daxlsizligini buzish”) bilan jinoyat ishi qo‘zg‘atilgan. Gumonlanuvchilar ushlangan va tergov harakatlari davom etmoqda.

• Bosqinchilik
• Janjal