Kecha, 5-iyul kuni huquqni muhofaza qilish idoralari tomonidan amalga oshirilgan tezkor tadbirlar natijasida Olmazor va Shayxontoxur tumanlarida istiqomat qiluvchi respublikamizda faoliyati taqiqlangan “Hizb ut-Tahrir” ekstremistik tashkiloti aʼzolarining faoliyatiga chek qoʻyildi. Bu haqda O‘zbekiston Ichki ishlar vazirligi xabar berdi.

Ma’lumotga ko‘ra, jinoiy guruhning faol aʼzosi boʻlgan “I.A” 10 nafardan ortiq sinfdoshlarini Telegram ilovasida tashkil qilgan “Choyxona” va “Iymonlashaylik” nomli virtual guruhlarga qoʻshib, taqiqlangan materiallarni tarqatib kelgan. Shuningdek, “I.A.” yaqinlari va koʻplab tanishlarini “tahrirchilar” safiga aʼzo boʻlishga daʼvat qilib, Internet orqali ekstremistik mazmundagi audio va video materiallarni tarqatib kelgan.

Oʻz navbatida guruh aʼzolari mazkur materiallar bilan tanishib, “Hizb ut-Tahrir” DET faoliyatini qoʻllab-quvvatlab kelishgan.

Mazkur jinoiy guruhning faoliyati ayni paytda Polshada yashirinib kelayotgan “Hizb ut-Tahrir” DETning gʻoyaviy yetakchilaridan biri boʻlgan, Oʻzbekistondagi va xorijdagi vatandoshlarimizni radikallashuviga hamda jinoyatchiga aylanib qolishlariga sababchi boʻlayotgan “Mahmud Abdulmoʻmin” taxallusli 1980-yilda Qirgʻiziston Respublikasida tugʻilgan, mazkur davlat fuqarosi va sodir etgan jinoyatlari uchun xalqaro qidiruvda boʻlgan Xoldarov Maxmudjon Abdumalikovich tomonidan boshqarilgan.

Hozirda yuqoridagi shaxslarga nisbatan tergov harakatlari olib borilmoqda.

• Terrorizm