2024-yil 10-avgust – 10-sentyabr kunlari Ekologiya, atrof-muhitni muhofaza qilish va iqlim o‘zgarishi vazirligi hamda O‘zbekiston Badiiy ijodkorlar uyushmasi tomonidan "Toshkent – 2024" III xalqaro haykaltaroshlik simpoziumi o‘tkaziladi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.

Qayd etilishicha, simpoziumda O‘zbekiston hamda xorijiy davlatlarning tajribali, mahoratli haykaltaroshlari tomonidan "Haykaltaroshlik va atrof-muhit" mavzusida toshdan ijod asarlari yaratiladi. Shuningdek, yosh ijodkorlar uchun mahorat darslari, amaliy mashg‘ulotlar tashkil etiladi, "ustoz-shogird" an’analari namoyish qilinadi. 

Bundan tashqari, simpozium ishtirokchilari uchun Toshkent shahri, Buxoro va Toshkent viloyatlaridagi muzeylar hamda madaniy meros obyektlariga sayohatlar uyushtiriladi.

“Simpozium davomida yaratilgan betakror badiiy yechimga, g‘oyaga ega bo‘lgan, yuksak estetik talab darajasidagi haykallar Toshkent shahrining madaniy muhiti va badiiy qiyofasini shakllantirish maqsadida istirohat bog‘lari, dam olish zonalari, ko‘ngilochar va sayyohlik maskanlariga, shu bilan birga, Markaziy Osiyo atrof-muhit va iqlim o‘zgarishini o‘rganish universiteti (Green University)ga  o‘rnatiladi”, deyiladi xabarda.

Simpozium yakunida ishtirokchilarga sertifikatlar va gonorarlar topshiriladi.

• Ekologiya
• haykaltaroshlik