Ayni vaqtda ijtimoiy tarmoqlarda issiq suv quvurida katta “avariya” yuz bergani, issiq suv favvora bo‘lib otilayotgani aks etgan video tarqalmoqda. Bu haqda Mirobod tumani hokimligi rasmiy munosabat bildirdi.

Qayd etilishicha, hozirda Toshkent shahrida issiqlik tarmoqlarini gidravlik sinovdan o‘tkazish ishlari davom etmoqda.

Ta’kidlanishicha, ayni holat gidravlik sinov vaqtida “Fayziobod” GAI hududida ro‘y bergan va shu joyning o‘zida barcha choralar ko‘rilgan. Hodisa oqibatida hech kim jabrlanmagan.

Ma’lum qilinishicha, 20-iyundan 2-avgustgacha Toshkent shahrida issiqlik tarmoqlarining gidravlik sinovlari (mexanik kuch va zichlik uchun yuqori bosim ostida issiqlik tarmoqlarining sinovlari) o‘tkaziladi.

Sinovlar davomida issiqlik tarmoqlari quvurlarining shikastlanishi va issiq suv yo‘llar va yo‘laklarga chiqishi mumkin. Haydovchilar, piyodalar hamda ma’muriy va turar-joy binolaridagi yurtdoshlarimizdan e’tiborli bo‘lishlarini so‘raladi.

Nosozliklar aniqlangan taqdirda (78) 129-01-85 telefon raqami orqali xabar berilishi mumkin.

Sinovlar 2014-yil 18-dekabrdagi “Issiqlik tarmoqlari va issiqlik punktlaridan texnik foydalanish qoidalari” bilan tartibga solinadi.

• Toshkent
• issiq suv