Ijtimoiy tarmoqlarda Toshkentda koʻp qavatli uylarning biridagi xonadonda 4 yashar bola qolib ketgani, ammo FVB qutqaruvchilari kelmagani haqida videolavha tarqaldi. Holat yuzasidan Toshkent FVB Matbuot xizmati munosabat bildirdi.

Qayd etilishicha, voqea Toshkent shahrining Yashnobod tumani Tuzel-1 massivida joylashgan koʻp qavatli uylardan birida sodir boʻlgan.

Qoʻshnilar xonadonda kattalar nazoratisiz yolgʻiz qolgan 4 yoshli bolaning yigʻisini eshitib, uni tinchlantirib turishgan.

Maʼlum qilinishicha, hozirda qutqaruv guruhining murojaat kelib tushgan manzilga oʻz vaqtida yetib borishiga masʼul boʻlgan xodimlarga nisbatan xizmat tekshiruvi oʻtkazilmoqda. Tekshiruv Toshkent shahar Favqulodda vaziyatlar boshqarmasi boshligʻi nazoratiga olindi. Aybdor xodimlar intizomiy javobgarlikka tortiladi.

“Maʼlumot oʻrnida shuni taʼkidlaymizki, Toshkent shahar Favqulodda vaziyatlar boshqarmasi navbatchilik boʻlimiga har kuni turli vaziyatlarda qolgan va qutqaruvchilar yordamiga muhtoj boʻlgan fuqarolardan 400 dan 600 tagacha murojaat kelib tushadi.

Qutqaruv guruhining ushbu qoʻngʻiroqda aytilgan manzilga oʻz vaqtida yetib bormaganligi juda kam uchraydigan hodisadir. Fursatdan foydalanib, ota-onalardan yosh farzandlarini kattalar nazoratisiz qoldirmasliklarini iltimos qilamiz”, – deyiladi xabarda.

• FVB
• Toshkent