Toshkent shahri Yunusobod tumanida “Malibu” o‘qotar qurol bilan to‘xtatilgani haqida xabar berilgandi. Ichki ishlar vazirligi kotibining ma’lum qilishicha, haydovchi qo‘lga olindi.

Ma’lum qilinishicha, mazkur holat yuzasidan tuman prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan. Qoidabuzar haydovchiga nisbatan qamoqqa olish ehtiyot chorasi qo‘llanilgan. Hozirda, tergov harakatlari davom etmoqda.

Ma’lumot o‘rnida aytish joizki, 7-yanvar kuni tumanning Yangishahar ko‘chasi bo‘ylab 1976-yilda tug‘ilgan, kuchli darajadagi mast holatda bo‘lgan fuqaro A.A. boshqaruvidagi “Malibu” avtotransporti to‘xtatilgan. Ammo haydovchi shu yerda xizmat o‘tayotgan YHX xodimlarining qonuniy talablariga bo‘ysunmasdan, o‘zgalarning hayoti va sog‘lig‘iga xavf solgan holda qochishga uringan.

Shuningdek, xodimlar haydovchining noqonuniy harakatlari oqibatida yuzaga kelishi mumkin bo‘lgan og‘ir oqibatlarning oldini olish maqsadida belgilangan tartibda o‘qotar qurolini qo‘llagan. Natijada avtotransport vositasi majburiy to‘xtatilib, haydovchi zararsizlantirilgan. Qurol qo‘llanilishi oqibatida hech kim jarohatlanmagan, deyiladi xabarda.

• IIV