Toshkent shahar IIBB tomonidan pirotexnika buyumlarining qonunga xilof muomalasiga qarshi kurash tadbirlari boʻlib oʻtdi. Bu haqda Toshkent shahar IIB xabar berdi.

Qayd etilishicha, 2021-yilning 8-noyabridan 22-noyabrga qadar boʻlgan davr ichida 482 ta tadbirlar oʻtkazilib, ular davomida jami 274 904 000 soʻmlik 559 776 ta pirotexnika buyumlari olib qoʻyilgan. Pirotexnika buyumlarining qonunga xilof muomalasi bilan bogʻliq faktlari boʻyicha belgilangan jarimalarning umumiy miqdori 8 775 000 soʻmni tashkil etgan.

Keltirilishicha, jumladan 2021-yil 15-noyabr kuni Bektemir tumanidagi Compass KSM yonida xodimlar tomonidan uch nafar yoshlar – 15 yoshli Sh.S., 14 yoshli B.А. va 15 yoshli R.K.dan protsessual tartibga rioya qilgan holda jami 1 069 ta pirotexnika buyumlarini olib qoʻyilib, bu toʻgʻrisida tegishli hujjatlarni rasmiylashtirilgan.

Pirotexnika buyumlarining qonunga xilof muomalasini oldini olishda transport vositalarini tekshirish boʻyicha oʻtkaziladigan profilaktik tadbirlar doirasida esa 2021-yil 15-noyabr kuni Toshkent shahar IIBB xodimlari, Milliy Gvardiya harbiy xizmatchilari va Davlat bojxona qoʻmitasi boshqarmasi xizmatchilarining qoʻshma tadbirlari davomida Chilonzor tumanidagi “Bek toʻpi” savdo markazi yonida “Isuzu” va “Lacetti” avtomobillari tekshirilganda jami 259 mln. soʻmlik 8 639 ta quti (518 400 ta) pirotexnika buyumlari topilib, protsessual tartibga koʻra olib qoʻyilgan.

• IIB
• Pirotexnika