Joriy yilda “Islom davlati” va “Tavxid va jixod katibasi” xalqaro terrorchilik tashkilotlari jangarilariga aloqador 4 ta yashirin guruh, 10 ta “virtual” guruh hamda 250 nafar ekstremistik guruh a’zolari aniqlanib qo‘lga olindi. Bu haqda Toshkent shahar IIBB axborot xizmati xabar berdi.
Qayd etilishicha, joriy yilda “Islom davlati” (ID) va “Tavxid va jixod katibasi" (TJK) xalqaro terrorchilik tashkilotlari (ushbu tashkilotlar faoliyati O‘zbekiston, RF, AQSH va ko‘plab Yevropa davlatlari hududida taqiqlangan) jangarilariga aloqador 4 ta yashirin guruh, yakka tartibda radikallashib, ekstremistik tashkilot va oqimlar g‘oyalarini targ‘ib qilib kelgan 10 ta “virtual” guruh hamda 250 nafar ekstremistik guruh a’zolari aniqlanib, ularning noqonuniy faoliyatiga chek qo‘yildi.
Shunday qilib, ular orasida 2022-yil boshida Toshkent shahrida 27 nafar shaxsdan iborat yashirin ekstremistik guruh faoliyatiga chek qo‘yildi. Guruhning ayrim a’zolari jangovar harakatlar yuz berayotgan hududlarga borishni rejalashtirgan va xalqaro terrorchilik guruhlarini moliyalashtirgan.
Shuningdek, “TJK” terrorchilik tashkilotining Suriyadagi ideologi ko‘rsatmasiga ko‘ra Toshkent shahrida 9 nafar shaxslardan iborat yashirin jamoat tashkil etgan 2001-yilga tug‘ilgan shaxs qo‘lga olindi. Ularning ayrimlari Suriyadagi jangarilar safiga borib qo‘shilishni rejalashtirgan.
Toshkent shahrida yashovchi, 18-27 yoshgacha bo‘lgan 10 nafar shaxslardan iborat “TJK”ning 2 ta yashirin guruhi aniqlangan. Ushbu guruhlar faoliyati “TJK”ning Suriyadagi mas’ullaridan biri “Abu Axmad uzbekiy” tomonidan boshqarilgan bo‘lib, guruh a’zolari poytaxtdagi ma’muriy binolar, aholi gavjum jamoat joylarida qo‘poruvchilik harakatlari sodir etishni rejalashtirganlar hamda terrorchilik tashkilotlari faoliyatini moliyalashtirib kelishgan.
Kechiktirib bo‘lmaydigan tezkor-tergov tadbirlar natijasida guruh a’zolaridan qo‘lbola portlovchi qurilma tarkibiy qismlari va niqoblovchi buyumlar ashyoviy dalil sifatida olingan.
Boshqa davlatlar maxsus xizmatlari bilan hamkorlik doirasida joriy yilning o‘tgan davrida qidiruvda bo‘lgan 59 nafar jangari hamda ekstremistik va terroristik tashkilotlar tarafdorlari ushlanib, O‘zbekistonga deportasiya qilindi.
Ular xorijda yashirinib, terrorchilik faoliyatini moliyalashtirish, Suriyadagi jangarilar lagerlariga yollash bilan shug‘ullangan. Ularning bir qismi O‘zbekistonda qo‘poruvchilik harakatlarini amalga oshirishni rejalashtirgan.
Shuningdek, joriy yilda Toshkent shahri va poytaxt viloyati aholisi orasidan “Hizb ut-Tahrir” diniy-ekstremistik tashkilotining 5 nafar faoli hamda ozod etilgan 10 nafar “tahrir” a’zolarining jinoiy harakatlariga chek qo‘yildi.
Shuningdek, Toshkent shahri va poytaxt viloyatida jinoiy-kriminal muhit vakillaridan iborat 8 guruhning qo‘poruvchilik faoliyatiga chek qo‘yildi. Terrorchi tashkilotlar mafkurachilari va emissarlarining mafkuraviy ta’siriga tushib, buzg‘unchi unsurlarni moliyalashtirish maqsadida talonchilik, tovlamachilik va o‘g‘irlik bilan shug‘ullangan. Ayni paytda guruh a’zolarining bir qismi Suriyadagi jangarilar lagerlariga ketishga hozirlik ko‘rayotgan edi.
“E’tiborli jihati shundaki, yuqoridagi guruhlarga aloqador shaxslarni hibsga olishni tashkil etish jarayonida ularga xos xususiyat aniqlandi. Ularning barchasi tashqi tomondan terroristik tuzilmalar tarafdorlariga taqlid qilgan, bu esa uzun soqol o‘stirishda namoyon bo‘lgan”, – deyiladi IIBB xabarida.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!