Toshkentda qurilish ob’yektida qimmatbaho daraxtlar kesib tashlandi. Bu haqda Ekologiya qo‘mitasi xabar berdi.

Qayd etilishicha, poytaxtning Yashnobod tumanidagi Iltifot mahallasi hududidagi qurilish ob’yektida daraxtlarning noqonuniy kesilayotgani bo‘yicha kelib tushgan ma’lumotga asosan Toshkent shahar Ekologiya va atrof-muhitni muhofaza qilish boshqarmasi, Yashnobod tuman hokimligi, tuman prokuraturasi, tuman ichki ishlar bo‘limi hamda Milliy gvardiya xodimlari bilan hamkorlikda o‘rganish o‘tkazilgan.

O‘rganishlar davomida qurilish tashkiloti hududi ko‘zdan kechirilganda 16 tup turli qimmatbaho bo‘lgan daraxtlarning noqonuniy ravishda tag qismidan kesib tashlanganligi aniqlandi.

Ushbu holat bo‘yicha O‘zbekiston Respublikasining “O‘simlik dunyosini muhofaza qilish va undan foydalanish to‘g‘risida”gi qonunining 37-moddasi talablari buzilib, o‘simlik dunyosiga ko‘p miqdorda zarar yetkazilganligi aniqlandi.

Dastlabki hisob-kitoblarga ko‘ra o‘simlik dunyosiga yetkazilgan zarar miqdori 3 mlrd 514 mln 200 ming so‘mni tashkil etmoqda.

O‘rganish natijasi bo‘yicha to‘plangan materiallar tegishli tartibda rasmiylashtirilib, tuman prokuraturasiga taqdim etilgan.

• Davlat ekologiya qo'mitasi
• Ekologiya
• Toshkent
• Yo‘l-qurilish
• daraxt