Ijtimoiy tarmoqlarda kichik yoshli bolani jismoniy og‘ritib, tibbiyot talablariga mutlaqo mos bo‘lmagan uqalash muolajasi amalga oshirilayotgani aks etgan videolavha tarqaldi. Chilonzor tumanidagi 38-oilaviy poliklinikada tasvirga olingani aytilgan bu xatti-harakatlar jamoatchilikning e’tirozlariga sabab bo‘ldi. Holat yuzasidan Sog'liqni saqlash vazirligi matbuot xizmati rasmiy munosabat bildirdi.

Daslabki tezkor o‘rganishlar natijasiga ko'ra, videolavhadagi uqalash seansi Chilonzor tumanidagi 38-oilaviy poliklinikada emas, balki ushbu muassasa binosining xususiy korxonaga tegishli bo‘lgan qismidagi xonalardan birida amalga oshirilgan.

Massaj muolajasini bajargan shaxs B.Z. bilan suhbatda u mazkur faoliyat bilan shug‘ullanish uchun tegishli ruxsatnoma va sertifikatga, qolaversa, fizioterapiya yo‘nalishida diplom va malaka toifasiga ega emasligini ma’lum qildi.

Shu bois Sog‘liqni saqlash vazirligi yuqoridagi holatga huquqiy baho berish uchun huquq-tartibot idoralariga murojaat qilgan.

O‘z navbatida, B.Z.ning xatti-harakatlariga tibbiy baho berish maqsadida Respublika ixtisoslashtirilgan travmatologiya va ortopediya ilmiy-amaliy tibbiyot markazi mutaxassislarining xulosalari olindi.

"Bolalar ortopediyasi amaliyotida uqalash muolajalari keng qo‘llaniladi va buning qat’iy qoida hamda talablari mavjud. Mazkur jarayonda kasallik turi, bolaning yoshi va holati hisobga olinib, har bir bemorga individual yondashilishi zarur.

Ammo eng muhim talablardan biri uqalash muolajasi chog‘ida kichik yoshli bemorda qo‘rquv bo‘lmasligi shart! Ammo videolavhada bola stress holatida ekanini ko‘rdik. Hatto yonida yaqini o‘tirganiga qaramay, tinimsiz yig‘lab, bezovta bo‘lmoqda. Bu uning nafaqat jismoniy salomatligi, balki ruhiyatiga ham juda yomon ta’sir ko‘rsatadi. Qisqa qilib aytganda, tibbiyotda bunday uqalash muolajasiga mutlaqo yo‘l qo‘yib bo‘lmaydi", - deydi Bolalar ortopediyasi bo‘limi rahbari, tibbiyot fanlari doktori, professor Ahrorbek Jo‘rayev.

Bolalar travmatologiyasi bo‘limi mudiri, tibbiyot fanlari doktori, professor Iskander Xodjanov esa massaj muolajalari ohista boshlanib, yuqori darajaga ko‘tarilgach, yana ohistalik bilan tugashi kerakligini ta'kidladi.

"Lekin biz videoda buning butunlay aksini ko‘rdik. Bunday holatlarda uqalash muolajasidan so‘ng paylar jarohatlanishi va hatto suyaklar sinishi kuzatilishi mumkin.

Massaj jarayonida og‘riq sindromi paydo bo‘lsa, bu kuchli qo‘rquvni keltirib chiqaradi. Ushbu holat esa keyinchalik zararlangan bo‘g‘imlarning umrbod ishlamay qolishi, ya’ni kontraktura paydo bo‘lishiga olib keladi. Shundan kelib chiqib, videolavhadagi muolaja usulini bugungi kun tibbiyotiga butunlay yot, deb hisoblayman", - deydi u.

“Uqalash muolajasi bilim, mahorat va tajriba talab etadi. Shu sababli ota-onalar bunday davolash seanslari uchun aynan shu sohaga ixtisoslashgan professional tibbiyot xodimlariga murojaat qilishlari lozim. 

Videolavhadagi xatti-harakatlarga kelsak, bu tibbiy uqalash muolajasi standartlariga mutlaqo to‘g‘ri kelmaydi. Gap inson, ayniqsa, jondan aziz farzandlarimiz salomatligi haqida ketar ekan, bu kabi holatlarga aslo ko‘z yumib bo‘lmaydi, degan fikrdaman”, - deya ushbu holatni qoralaydi Tibbiyot fanlari nomzodi Muratjan Saliyev.

Vazirliklik xabariga ko'ra, ayni paytda holat yuzasidan tekshiruv ishlari davom ettirilmoqda va ularning natijalari bo‘yicha qo‘shimcha ma’lumot beriladi. 

• massaj