Toshkent shahrida suv ta’minoti tizimidagi sarf-xarajatlarning keskin ortganligi munosabati bilan ichimlik hamda oqova (kanalizatsiya) suv xizmatlari narxi oshishi kutilmoqda. Bu haqda “Toshkent shahar suv ta’minoti” MCHJ ma’lum qildi.

Xabarga ko‘ra, aholi uchun bir metr kub suv narxi 1400 so‘m, oqova suv narxi esa 1000 so‘m, yuridik tashkilotlar uchun ichimlik suvi narxi 3000 so‘m, oqava suv narxini esa 2200 so‘m etib belgilash bo‘yicha takliflar Toshkent shahar deputatlari kengashiga taqdim etilgan.

Deputatlar kengashi muhokamasi yakunidan kelib chiqib suv va kanalizatsiya narxlari oshish sanasi haqida qo‘shimcha ma’lumot beriladi.

Qolaversa, yakuniy xulosalar bo‘yicha ommaviy axborot vositalari hamda blogerlar uchun matbuot anjumani tashkil etish rejalashtirilgan.

Ma’lumot o‘rnida, Toshkent shahridagi oshishi kutilayotgan suv va kanalizatsiya narxlari Toshkent viloyati hamda respublikaning boshqa hududlaridagi ayni kundagi narxlardan pastligicha qolmoqda.

• Ichimlik suvi
• Qaror
• Toshkent