Ijtimoiy tarmoqlarda tarqalgan yangi qurilgani aytilgan ko‘p qavatli uy devorlari ichidan darz ketgani aks etgan lavha yuzasidan Qurilish va uy-joy kommunal xo‘jaligi vazirligi quyidagilarni ma’lum qiladi:

Qayd etilishicha, Mirzo Ulug‘bek tumanining Mag‘rur ko‘chasidagi 55B-uy 2017-yilda fuqaro B.Zokirov tomonidan o‘zi va oila a’zolarining yashashi uchun yakka tartibdagi uy-joy sifatida qurilgan va fuqarolarga alohida kvartira sifatida o‘zboshimchalik bilan rekonstruksiya qilingan holda sotilgan.

Mazkur holat yuzasidan X.Sulaymonova nomidagi Respublika sud ekspertiza markazining 2020-yil 17-dekabrdagi sud qurilishi-texnika ekspertizasining xulosasida, ushbu uylar talabga javob bermasligi hamda Mag‘rur ko‘chasi 55 B-uy binosi seysmik zonada qurilish o‘tkazish talablariga javob bermasligi aniqlanib, mazkur uy hozirgi kunda avariya holatida ekanligi aniqlangan.

B.Zokirov o‘z manfatlarini ko‘zlagan holda fuqarolarning ishonchiga kirib, yakka tartibda foydalanish maqsadida qurilgan turar joy binosini ko‘p kvartirali uy-joy sifatida aldov yo‘li bilan fuqarolarga sotganligi sababli, 2022-yil 14-mayda JKning 186-moddasi 4-qismi “a”, “b” bandlari, 168-modda 4-qismi “a” bandi va 229-moddalari bilan ayblov e’lon qilinib, B.Z. va uning sheriklariga nisbatan “qamoqqa olish tarzidagi” ehtiyot chorasi qo‘llanilgan va jinoyat ishi bo‘yicha ayblov xulosasi tasdiqlanib, 2022-yil 18-may kuni jinoyat ishlari bo‘yicha Mirzo Ulug‘bek tuman sudiga yuborilgan.

Sudning 2022-yil 1-iyuldagi hukmiga ko‘ra “Quyun” MCHJ rahbari B.Zokirovga 186-moddasi 4-qismi “a”, “b” bandlari, 168-modda 4-qismi “a” bandi va 229-moddalarida nazarda tutilgan jinoyatlarni sodir etganlikda aybli, deb topilib, 8 yil 2 oy muddatga ozodlikdan mahrum qilish jazosi tayinlangan.

Hozirgi kunda fuqarolarga yetkazilgan zararni qoplash maqsadida sud organi tomonidan kompensasiya pulini undirish uchun sud jarayonlari davom etmoqda.

• Toshkent
• Uy-joy