Hujjat loyihasi bilan “Hunarmand” uyushmasi, Oliy taʼlim, fan va innovatsiyalar vazirligi ishtirokida Xalqaro hunarmandchilik, badiiy sanʼat va dizayn institutini tashkil etish toʻgʻrisidagi taklifiga rozilik berilmoqda.

Quyidagilar institutning asosiy vazifalari va faoliyati yoʻnalishlari etib belgilanadi:

- hunarmandchilik yoʻnalishida oliy maʼlumotga ega kadrlarni tayyorlash, jumladan, “usta-shogird” anʼanalari asosida dual taʼlim tizimini keng joriy qilish;

- hunarmandchilikning anʼanaviy turlarini saqlab qolgan holda, zamon talablariga moslashtirish va rivojlantirish;

- hunarmandchilik hamda zamonaviy arxitektura, qurilish, dizayn, toʻqimachilik va boshqa sanoat sohalari oʻrtasida oʻzaro integratsiyani taʼminlash;

- usta-hunarmandlar tomonidan maktablarda amaliy saboq berish amaliyotini yoʻlga qoʻyishga uslubiy koʻmaklashish;

- hunarmandchilik sohasida amaliy va innovatsion tadqiqotlar hamda zamonaviy talablar asosida ilmiy va ilmiy-pedagogik kadrlar tayyorlash.

Institutda bakalavriat taʼlim yoʻnalishlari va magistratura mutaxassisliklariga qabul parametrlari respublika mehnat bozori ehtiyojlari hamda universitetning moddiy-texnik imkoniyatidan kelib chiqib, Oliy taʼlim, fan va innovatsiyalar vazirligi bilan kelishilgan holda institut tomonidan belgilanadi.

Institutga abituriyentlarni qabul qilish va bitiruvchilarni attestatsiyadan oʻtkazish “Hunarmand” uyushmasi hamda Oliy taʼlim, fan va innovatsiyalar vazirligi bilan kelishilgan holda institut tomonidan belgilanadigan talablar, tartib va muddatlarga muvofiq amalga oshiriladi.

Shartnoma shartlariga muvofiq, institut bitiruvchilariga oliy taʼlim toʻgʻrisidagi hujjat sifatida tan olinadigan davlat tomonidan tasdiqlangan namunadagi diplom beriladi. Institut rektori muassis tomonidan lavozimga tayinlanadi va lavozimidan ozod qilinadi. Institutda talabalar oʻqishi uchun toʻlov-kontrakt mablagʻlari miqdori muassis tomonidan belgilanadi.

• Hunarmandchilik
• Institut
• Loyiha
• Oliy ta'lim, fan va innovatsiyalar vazirligi
• Qaror