“Xavfsiz hudud — xavfsiz tun” tezkor profilaktik tadbirlari doirasida Toshkent tumanida xonadonda giyohvand moddalari hamda toʻpponcha oʻqlari saqlagan fuqaro aniqlandi. Bu haqda IIBB axborot xizmati xabar bermoqda.

Qayd etilishicha, Toshkent tumani Sarka MFYda yashovchi 1982-yilda tugʻilgan B.M.ning xonadoni tuman IIB tezkor xodimlari tomonidan koʻzdan kechirilganda, xonadon molxonasida 1,5 metrli quritilgan holatdagi hamda yertoʻla ichida isteʼmol qilish uchun tayyorlangan giyohvandlik modasi borligi aniqlangan.

Shuningdek, yertoʻlada 16 dona “Margolin”, 30 dona “Makarov” toʻpponchasi oʻqlari va 1 dona oʻqdon borligi aniqlanib, xolislar ishtirokida daliliy ashyo sifatida rasmiylashtirilib olingan (ekspertiza tayinlangan).

Maʼlum qilinishicha, holat yuzasidan fuqaro B.M. ga nisbatan Oʻzbekiston Respublikasi JKning 248- va 276-moddasi bilan jinoyat ishi qoʻzgʻatilgan. Tergov olib borilmoqda.

• Giyohvandlik
• IIB
• Toshkent