Davlat aktivlarini boshqarish agentligi davlat tashkilotlarini xususiylashtirish jarayoni natijasi to‘g‘risida axborot berdi. 

Unga ko‘ra, “Malika” savdo va maishiy xizmat ko‘rsatish majmuasi bo‘yicha savdolarda “Premium Prime Service” MChJ 125 mlrd. so‘m xarid qiymatini bir yo‘la to‘lash hamda ta’mirlash-tiklash ishlari uchun 100 mlrd. so‘m miqdorida investitsiya kiritish va 250 ta yangi ish o‘rinlarini yaratish sharti bilan sotilgan.

Shuningdek, Davlat tender komissiyasining tegishli qaroriga muvofiq quyidagi davlat ko‘chmas mulk obyektlarining ommaviy savdo jarayonlari g‘oliblari belgilangan.

– “Poytaxt biznes majmuasi” MChJ mulkiy majmuasi bo‘yicha savdolarda “Quadro IH DMCC” (BAA) kompaniyasi 164 mlrd. so‘m xarid qiymatini bir yo‘la to‘lash hamda ta’mirlash-tiklash ishlari uchun 6 mln. AQSh dollaridan kam bo‘lmagan miqdorda investitsiya kiritish sharti bilan;

– “Beldersoy oromgohi” dam olish maskani (Kanat yo‘li bilan birga) bo‘yicha savdolarda “Ulkan Mulk” MChJ 107 mlrd. so‘m xarid qiymatini bir yo‘la to‘lash sharti bilan savdo g‘olibi deb topilgan.

Agentlikning ta’kidlashicha, Prezidentning 2020-yil 27-avgustdagi PF-6053-son Farmoni talablariga ko‘ra, “Chorvoq” turistik-rekreatsion zonasi direksiyasi hududida amalga oshiriladigan loyihalar Direksiya bilan kelishilgan holda amalga oshiriladi.

Shuningdek, daraxt va butalarning kesilishiga joriy etilgan moratoriy talablariga rioya qilinadi.

• Davaktiv
• Toshkent