Joriy yil 4-5-noyabr kunlari Toshkentda kuzatilgan chang bo‘ronidan so‘ng cho‘kkan chang tarkibi o‘rganib chiqildi. Chang tahlili uchun namunalar poytaxtning Olmazor tumani “Beruniy” metro bekati va Mirzo Ulug‘bek tumanining “Akadem shaharchasi” hududlaridan olingan. 

Innovatsion rivojlanish vazirligi Matbuot xizmatining ma’lum qilishicha, chang tarkibi SmartSEM dasturiy ta’minot yordamida 100 mkm dan 1 mkm gacha bo‘lgan turli masshtablarda olindi.

Ilg‘or texnologiyalar markazi va O‘zR FA Bioorganik kimyo instituti olimlari tomonidan olib borilgan o‘rganishlarda namunalar SEM - EVO MA 10 (Zeiss, Germaniya), Panalytical Empyrean rentgen difraktometri, Agilent 7890B gaz xromatografi kabi qurilmalarda tahlil qilindi. Uskunalar ishi Data Collector dasturi yordamida nazorat qilindi.

Tahlillar natijasiga ko‘ra, chang hajmi 5 mikrongacha bo‘lib, bu kattalikdagi chang zarralari ancha zararsizdir.
2021-yil 5-noyabrdagi chang namunalari 42 turdagi pestitsidlarga gaz xromatografiyasi yordamida tahlil qilinganda namunalarda pestitsidlar mavjud emasligi aniqlangan. 

“Tahlil ma’lumotlari chang tarkibida tuz ham me’yorda ekanligini ko‘rsatdi. Chang namunalarida rN o‘lchovi chang eriganida ishqoriy xususiyatlarini ko‘rsatdi.
Namunalar tahlili ular tabiatiga ko‘ra standart chang ekanligini ko‘rsatdi.
Chang tarkibida og‘ir metallar, tuzlar, inson salomatligi uchun xavfli pestitsidlar mavjud emas”, – deyiladi olimlar xulosasida.

• Ekologiya
• Ob-havo
• Toshkent