Transport vazirligi huzuridagi Fuqaro aviatsiyasi agentligi ayrim Yaqin Sharq davlatlari fuqarolarining O‘zbekiston orqali Belarusga aviatranziti vaqtincha cheklanganini rasman e’lon qildi.

Qayd etilishicha, 2021-yil 17-noyabrdan O‘zbekiston hududi orqali Iroq, Suriya, Yaman, Livan, Liviya va Afg‘oniston fuqarolari – tranzit yo‘lovchilarning Belarus hududiga kirishiga hamda ularga aviachiptalar sotilishiga vaqtinchalik cheklovlar o‘rnatildi.

“O‘zbekiston Respublikasida ro‘yxatdan o‘tgan rezident aviakompaniyalar tomonidan mazkur davlatlar fuqarolari–tranzit yo‘lovchilarga sotilgan aviachiptalar aniqlangan taqdirda, ushbu yo‘lovchilarga chipta puli belgilangan tartibda jarima qo‘llamagan holda qaytarilishi lozim”, – deyiladi Agentlik xabarida.

Bildirilishicha, mazkur cheklovlar Iroq, Suriya, Yaman, Livan, Liviya va Afg‘oniston davlatlarining diplomatik pasport yoki Belarus Respublikasida doimiy yashash uchun berilgan yashash guvohnomasiga ega fuqarolariga nisbatan tatbiq etilmaydi.

Eslatib o‘tamiz, avvalroq Yevrokomissar Jozep Borrel Twitter’dagi sahifasi orqali tranzit yo‘lovchilarni Belarusga uchishini cheklovchi O‘zbekiston qo‘llayotgan tadbirlarni olqishlagan edi.

• Aviaqatnov
• O‘zbekiston
• Uzbekistan airways