31°
Kechasi 18°
Respublika ixtisoslashtirilgan travmatologiya va ortopediya ilmiy-amaliy tibbiyot markazida 2025-yilda bu yo‘nalishda qator yangiliklar joriy etilishi kutilmoqda.
“Muassasamizda “robot jarrohligi”ni yo‘lga qo‘yish, xususan, ushbu amaliyotni tizza bo‘g‘imlari kasalliklarini davolash jarayonida qo‘llashni rejalashtirganmiz”, – deydi markaz direktori Murod Irismetov.
Mazkur yangilik shifokorga inson tanasining eng murakkab qismlari hamda kasallikning eng og‘ir darajalarida xam erkin ishlash imkonini beradi.
Natijada maxsus dastur yordamida murakkab amaliyotlar chog‘ida yuzaga kelishi mumkin bo‘lgan xirurgik xatoliklarning oldi olinadi.
Ilg‘or diagnostika va muolaja usullarini bosqichma-bosqich tumanlarda ham joriy qilinmoqda. Jumladan, shu yil davomida tuman (shahar) shifoxonalarida 2 ta yangi diagnostika va 8 ta davolash usuli amaliyotga tatbiq etiladi.
O‘zbekistonning 48 ta tumani va 10 ta shaharlarida son suyagi distal oxiri siniqlarini retrograd BIOS qilish, chanoq-son va tizza bo‘g‘imlarini total endoprotezlash, son suyagi proksimal oxiri siniqlarini yangi modeldagi BIOS INTERTAN bilan osteosintezlash, butsimon boylamlar jarohatining artroskopik autoplastikasi, PRP terapiya, AO plastinalari bilan osteosintez qilish usullari o‘zlashtiriladi.
Natijada bemorlarning ortiqcha vaqt va mablag‘ sarflab, xorijiy davlatlar yoki poytaxtimiz va viloyatlar markazlariga uzoq tumanlardan qatnovi 10 foizga kamayadi.
Bundan tashqari, bevosita markaz mutaxassislari tomonidan hududlarda 6 mingga yaqin tibbiy ko‘riklar, 300 dan ziyod yuqori texnologik operatsiyalar o‘tkaziladi.
Buxoro, Samarqand, Farg‘ona, Toshkent va Navoiy viloyatlarida sayyor sikllar tashkil qilinib, mahalliy mutaxassislarni o‘qitish orqali chaqaloqlarda chanoq-son bo‘g‘imi displaziyasini UTT yordamida diagnostika qilish usuli yo‘lga qo‘yiladi.
O‘z navbatida, Xitoy, Rossiya, Germaniya, AQSH, Janubiy Koreya, Turkiya, Belarus, Hindiston kabi qator rivojlangan davlatlardan malakali mutaxassislarning mamlakatimizga tashrifi amalga oshirilib, ular ishtirokida joylarda mahorat darslari, tibbiy ko‘riklar va qo‘shma operatsiyalar o‘tkazilishi rejalashtirilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
