Ma’lumotlarga ko‘ra, Anqarada ichki ishlar vazirligi binosi oldida ro‘y bergan portlashdan bir necha soat vaqt o‘tib Turkiya Iroq shimolidagi kurdlarning pozitsiyalari bo‘ylab aviazarbalar bergan. Turkiya hukumatiga ko‘ra, aviazarbalardan so‘ng Kurdiston ishchilar partiyasining 20 ta obyekti yo‘q qilingan.

Turkiya qurolli kuchlari Iroq shimolidagi Kurdiston ishchilar partiyasi (KIP) obyektlariga havodan zarbalar berdi. Bu haqda Turkiya mudofaa vazirligi 1-oktyabr kuni kechqurun e’lon qilingan bayonotda aytiladi.

Vazirlikka ko‘ra, zarbalardan maqsad “KIP va boshqa terrorchi unsurlarni zararsizlantirish, Shimoliy Iroqdan Turkiya aholisi va huquq-tartibot organlariga qarshi qaratilgan terrorchilik hujumlari amalga oshirilishining oldini olish, chegara xavfsizligini ta’minlash” bo‘lgan.

“KIP tomonidan foydalanilgan g‘orlar, bunkerlar, boshpana va omborlardan iborat jami 20 ta obyekt yo‘q qilindi. Hujumlar davomida ko‘p sonli terrorchilar zararsizlantirildi”, — deyiladi mudofaa vazirligi xabarida. 

Amaliyot davomida tinch aholi, tarixiy-madaniy boyliklar va atrof-muhitga zarar yetkazmaslik uchun barcha ehtiyot choralari ko‘rilgani qayd etilgan. Turkiya qurolli kuchlari “mamlakat va xalqning omon qolishi va xavfsizligi uchun” terrorizmga qarshi kurashni davom ettirishi ta’kidlangan. 

Shu kuni Iroqning Turkiya va Eron bilan chegarasiga yaqin joylashgan Sidakan shahri meri AFP agentligiga Bradost hududi va Badran qishlog‘i bombardimon qilinganini aytdi. 

Kurdlarning Rudaw axborot agentligi zarbalar Iroq shimolida, Eron bilan chegaradagi Qandil tog‘ tizmasi bo‘ylab berilganini tasdiqladi. Harakatlanish qiyin bo‘lgan Qandil tog‘lari anchadan buyon KIPning tayanch bazalaridan biri hisoblanadi.

• Eron
• Iroq
• Turkiya