Avvalroq Turkiyaning Izmir viloyatida vertolyot halokatga uchragani haqida xabar bergan edik. Aniqlanishicha, ushbu vertolyot ichida uch nafar Qirg‘iziston fuqarosi bo‘lgan. Bu haqda turk nashrlari yozmoqda.

Turkiya Qishloq va o‘rmon xo‘jaligi vaziri Ibrohim Yumaklining aytishicha, Turkiyaning Izmir viloyatidagi Menderes mintaqasida o‘rmonda yong‘in kelib chiqqan. Vertolyot o‘rmon yong‘inini o‘chirish uchun suv olib ketayotganida Taxtali suv omboriga qulagan. Ekipajda to‘rt kishi bo‘lib, ulardan uch nafari qirg‘izistonlik, 1 nafari turk bo‘lgan.

Bortdagi to‘rt kishi orasidan ular ikkinchi uchuvchi bo‘lib ishlayotgan Qirg‘iziston fuqarosini qutqarib qolishgan. U og‘ir ahvolda shifoxonaga yetkazilgan. Hozirda halokatga uchragan vertolyotdagi yana uch kishini qidirish ishlari davom etmoqda.

Ma’lumot uchun, Turkiyada Izmir viloyatining Menderes tumanidagi o‘rmonda boshlangan yong‘in tezda katta hududga tarqaldi. Uni o‘chirishga 9 ta samolyot, 20 ta vertolyot, 54 ta suv tashish mashinasi, 10 ta ish mashinasi va 500 ga yaqin o‘t o‘chiruvchi jalb qilingan.

Hozircha Qirg‘iziston Tashqi ishlar vazirligi voqea haqida ma’lumot bermagan.

• Qirg‘iziston
• Turkiya