Ma’lumotlarga ko‘ra, Turkiya shimoliga kuchli dovul kelib, 9 kishi halok bo‘lgani aytilmoqda. Bu haqda mahalliy nashrlar xabar berdi.

Kuchli yomg‘ir va bo‘ron tufayli Batman, Diyorbakir va Zonguldak viloyatlarida odamlar halok bo‘lgan. 

“Afsuski, biz 9 nafar vatandoshimizni yo‘qotdik”, deydi Turkiya Ichki ishlar vaziri Ali Yerlikaya.

Uning aytishicha, Zonguldak viloyatida bo‘ron va sel oqibatida turar-joy binolari, davlat muassasalari, infratuzilma va xususiy obyektlar zarar ko‘rgan. Shamol 57 ta maktab, 43 ta uy va xususiy mulkning tomlarini uchirib ketgan, sel suvlari binolarning birinchi qavatlari va ekin maydonlarini bosib ketgan, yo‘llarni yuvgan.

“Birinchi bosqichda tabiiy ofat oqibatlarini bartaraf etish uchun yordam sifatida 50 million lira ajratdik”, degan vazir.

Mamlakat prezidenti Rajab Toyyib Erdo‘g‘an ham ofatdan zarar ko‘rganlarga hamdardlik bidirdi.

“Zararni baholash bo‘yicha tadqiqotlarni tezda tugatgandan so‘ng, biz yordam to‘lovlarini amalga oshiramiz”, degan prezident.

• IIV
• Prezident
• Sel
• Turkiya