Tadqiqotlarga ko‘ra, vaksinalar yiliga o‘rtacha 4,5 million kishining hayotini saqlab qolishga yordam beradi. Agar emlash vositalari tanqisligi muammosi bartaraf etilsa, 2030-yilga borib, bu ko‘rsatkich yana 30 foizga oshishi mumkin.

Biroq oxirgi yillar, xususan, pandemiya davrida dunyo bo‘yicha aholining vaksinalarga bo‘lgan ishonchi pasayib bormoqda.

Qayd etilishicha, ijtimoiy so‘rovda ishtirok etgan 55 davlatdan 52 tasida uch yil ichida bolalarni emlashga nisbatan jamoatchilik ishtiyoqi pasaygan.

Hindiston, Vyetnam, Xitoy davlatlarida immunizasiyaning ahamiyatini yuqori, Yaponiya, Janubiy Koreya va Papua-Yangi Gvineyada esa aksincha past baholashgan.

Yevropa davlatlari o‘rtasida Portugaliya, Shvesiya va Irlandiya aholisining vaksinalarga ishonchi baland. Xorvatiya, Latviya va Rossiyada esa buning aksi kuzatilgan.

Shunga qaramay, bolalar sog‘ligi uchun vaksinalar zarur, deb hisoblovchilar qatlami 80 foizdan yuqori bo‘lib chiqqan.

Hisobotda keltirilishicha, 2019–2021-yillar davomida 48 million nafar o‘g‘il-qiz yuqumli kasalliklarga qarshi vaksina olmagan. 19 million bola esa to‘liq bosqichda emlanmagan.

Bu turli epidemiyalar, masalan, 2021–2022 yillarda qizamiq bilan kasallanish ko‘rsatkichlari ikki baravar ko‘payishiga sabab bo‘lgan.

Qolaversa, ekspertlar bemorlar soni ortishi Afrika va Janubiy Osiyoda vaksinalar taqchilligi muammosi bilan ham bog‘liq, degan xulosada.

• Bolalar
• UNICEF
• Vaksina