Ukraina Oliy radasi mamlakat mudofaa vazirligiga yangi rahbar tayinladi. Qonunchilar Mixail Fyodorov nomzodini ma’qulladi. Shunday qilib, u keng ko‘lamli urush boshlangan 2022-yildan buyon ushbu lavozimni egallagan to‘rtinchi vazir bo‘ldi. Tayinlov Rossiya armiyasi qator yo‘nalishlarda hujum harakatlarini jadallashtirgan bir vaqtda bo‘lib o‘tdi.

34 yoshli Mixail Fyodorov bungacha Ukraina bosh vazirining birinchi o‘rinbosari hamda raqamli transformatsiya vaziri lavozimlarida faoliyat ko‘rsatgan. Mulozim Ukrainada va mamlakat tashqarisida davlat boshqaruvi, shuningdek, mudofaa sohasiga zamonaviy texnologiyalarni joriy etish bo‘yicha asosiy tashabbuskorlardan biri sifatida tanilgan.

Fyodorov o‘zining parlamentdagi chiqishida Ukraina armiyasini zamonaviylashtirish, mamlakat harbiy salohiyatini raqamli texnologiyalar, dronlar va innovatsion yechimlar asosida kuchaytirishga e’tibor qaratishini ta’kidladi. U, shuningdek, urush sharoitida tezkor qarorlar, texnologik ustunlik va moslashuvchan boshqaruv hal qiluvchi ahamiyatga ega ekanini qo‘shimcha qildi.

“Biz dunyoda birinchi bo‘lib dronlardan iborat hujum polklarini tashkil etdik. Ulardan biri yaqinda Kupyanskni ishg‘oldan ozod qilishda asosiy zarbdor kuch bo‘ldi”, – degan yangi vazir.

Kuzatuvchilar Fyodorovning eng muhim lavozimlardan biriga tayinlanishini Ukraina mudofaa siyosatida zamonaviy texnologiyalarga e’tiborni kuchaytirmoqchi bo‘layotgani bilan izohlagan. Avvalroq u dronlar, raqamli boshqaruv tizimlari va harbiy innovatsiyalarni joriy etish orqali armiyaning jangovar imkoniyatlarini oshirishga hissa qo‘shgandi.

• Mudofaa vazirli
• Ukraina doni