Ma’lumotlarga ko‘ra, Ukraina va Isroilga ko‘p milliard dollarlik yordam ajratish to‘g‘risidagi qonun loyihasi AQSh Kongressi Senatida protsessual ovoz berishdan o‘tolmadi. Ushbu hujjatni keyingi ko‘rib chiqish uchun senatorlarning kamida 60 nafar ovozi zarur edi. Biroq 6-dekabr, chorshanba kuni uni qo‘llab-quvvatlagan holda atigi 49 nafar qonun chiqaruvchi ovoz berdi, yana 51 nafari qarshi chiqdi, respublikachilarning barchasi loyihani qo‘llab-quvvatlashdan bosh tortdi. Kongressning ikkala palatasidagi respublikachilar qo‘llab-quvvatlash sharti sifatida immigratsiya qonunlarini qat’iylashtirishni talab qildi.

Senatda ovoz berishdan oldin AQSh prezidenti Jo Bayden nutq so‘zlab, Kongressni qonun loyihasini qabul qilishga chaqirdi. U harakatsizlik faqat Ukrainaga qarshi boshlagan urushda Rossiyaga foyda keltirishi haqida ogohlantirdi.

Ukrainaga yordam berish uchun pul deyarli tugadi. Oktyabr oyida Bayden Kongressdan taxminan 106 milliard dollarlik qo‘shimcha moliyalashtirish paketini tasdiqlashni so‘radi, shundan 61 milliard dollari Ukrainaga yordam berishga, 14 milliard dollari esa Isroil mudofaasini mustahkamlashga mo‘ljallangan edi.

Aksariyati respublikachilar bo‘lgan Vakillar palatasi yordamni faqat Isroil uchun ajratishga ovoz berdi, biroq demokratlar nazoratidagi Senat tashabbusga to‘sqinlik qildi. Bayden agar Kongress bunday hujjatni ma’qullagan taqdirda, Ukrainasiz faqat Isroilga yordam ajratish to‘g‘risidagi qonun loyihasini imzolamasligini aytdi.

Agar AQSh Kongressi Kiyevga yordam uchun qo‘shimcha mablag‘ ajratishni ma’qullamasa, Vashingtonning joriy yil oxirigacha Ukrainaga qurol-yarog‘ va jihozlar sotib olish uchun resurslari tugaydi, dedi Oq uy boshqaruv va budjet bo‘limi direktori Shalanda Yang Vakillar palatasi spikeri Mayk Jonsonga. Uning so‘zlariga ko‘ra, Amerika qurol-yarog‘i va jihozlarini yetkazib berishni to‘xtatish “nafaqat Ukraina erishgan muvaffaqiyatlarni xavf ostiga qo‘yadi, balki Rossiya harbiylarining g‘alabasi ehtimolini oshiradi”.

• AQSh
• Isroil
• Ukraina