2022-yil 22-yanvar kuni Umra safari uchun birinchi reysni Saudiya Arabistoniga uchirishga tayyorgarlik ko‘rilmoqda. Bu haqda O‘zbekiston musulmonlari idorasi Matbuot xizmati ma’lum qildi.

Qayd etilishicha, 25, 28-yanvar kunlari ham navbatdagi reyslar amalga oshiriladi.  Bundan tashqari safarga reyslar kelgusida sezilarli darajada oshirib boriladi.

O‘MI Matbuot xizmatiga ko‘ra, joriy umra mavsumida birinchi navbatda pandemiyadan oldin, ya’ni 2020-yil fevral oyi oxiriga qadar umra ziyorati uchun to‘lovlarni amalga oshirib, safarga bora olmagan fuqarolar yuboriladi.

Shuningdek, O‘MI pandemiyadan oldin, ya’ni 2020-yil fevral oyiga qadar umra ziyorati uchun to‘lovlarni amalga oshirganlarni qo‘shimcha ravishda 4 mln 770 ming so‘m qo‘shimcha mablag‘ to‘lashi haqida ma’lum qildi.

“Qo‘shimcha to‘lovni belgilashda, mehmonxonalarda ziyoratchilarning xonalarga, avtobuslarda o‘rindiqlarga joylashtirishda oraliq masofa hisobiga 50 foizgacha qisqartirilish, oziq-ovqat mahsulotlarini qadoqlangan holda tarqatish, o‘rnatilgan boshqa karantin tartib-qoidalarni ta’minlash, 15 foiz Saudiya QQS solig‘i kabi sarf-xarajatlar ham hisobga olingan”, – deyiladi O‘MI xabarida.

Ma’lumot uchun, Umra safariga boruvchi fuqaro “COVID-19”ga qarshi “Astra-Zeneca”, “Moderna”, “Pfizer” yoki “Jonson & Jonson” vaksinalari bilan to‘liq emlanib, sertifikatga ega bo‘lishi lozim.

• Umra