UzAuto Motors 2021-yilning oktyabr-noyabr oylarida Chevrolet Lacetti va Chevrolet Labo avtomobillarini olishi kerak bo‘lgan xaridorlarga ogohlantirish bilan chiqdi. Unga ko‘ra, mazkur xaridorlar yana ikki oy kutishlari kerak.

Kompaniyaning bildirishicha, avtomobilni yetkazib berish bo‘yicha ilgari tuzilgan shartnomaning 1.2 bandiga mos ravishda shartnomaga 3.1.1 bandni kiritishga majbur bo‘lingan.

“Boshqacha aytganda, “UzAuto Motors”ga bog‘liq bo‘lmagan holatlar tufayli, yarim o‘tkazgichlardan (mikrochiplardan) tayyorlangan butlovchi qismlarning global taqchilligi sababli, kompaniya 3.1.1 bandini qo‘llashga hamda 3.1 bandda ko‘rsatilgan Chevrolet Lacetti hamda Labo avtomobillarining kutilayotgan yetkazib berish muddatini 2 oyga uzaytirishga majbur”, – deyiladi avtokompaniya xabarida.

Shuningdek, UzAuto Motors mazkur holatni “ekstremal chora” deb ataydi va iste’molchilar tomonidan to‘g‘ri tushunilishiga umid qiladi.

“Shuningdek, ishontirib aytamizki, uzoq kutilgan avtomobilingizni imkon qadar tezroq olishingiz uchun qo‘limizdan kelgan barcha imkoniyatlarni qilamiz”, – deyiladi UzAuto Motors xabarida.

• Avto
• UzAuto