Uzbekistan Airways “Sharqiy” xab loyihasi doirasida Namangandan Rossiyaning 8 ta shahriga parvozlarni yo‘lga qo‘yadi. Bu haqida aviakompaniya matbuot xizmati xabar berdi.

Ma’lum qilinishicha, Uzbekistan Airways tomonidan Farg‘ona vodiysidan talab yuqori bo‘lgan yo‘nalishlar bo‘yicha parvoz qilish uchun shart-sharoitlar yaratish maqsadida “Sharqiy” xab loyihasi tashkil etilgan.

Loyihaga ko‘ra, aviakompaniya mintaqadan Rossiya va Farg‘ona vodiysi aholisi orasida mashhur bo‘lgan uzoq xorij shaharlariga yo‘nalish tarmog‘ini kengaytirish uchun Namangan va Farg‘ona shaharlarining xalqaro aeroportlaridan foydalanadi.

Qayd etilishicha, 2022-yilning 31-yanvaridan boshlab aviakompaniya Uzbekistan Airways Express havo kemalarida Full Economy (to‘liq iqtisodiy sinf) tamoyili asosida Namangandan Moskva, Perm, Samara, Omsk, Orenburg, Irkutsk, Krasnodar va Yekaterinburgga to‘g‘ridan-to‘g‘ri muntazam aviaqatnovlarni amalga oshirishni boshlaydi. Talab oshgani sayin, Namangandan yo‘nalish tarmog‘ini kengaytirish ham ko‘rib chiqiladi.

Ta’kidlanishicha, Farg‘ona shahar xalqaro aeroportidan Moskva, Qozon va Istanbulga aviaqatnovlar amalga oshirilmoqda va bu “Sharqiy” xab tashkil etilishining birinchi bosqichi bo‘lib xizmat qilgan. “Sharqiy” xabni rivojlantirishning ikkinchi bosqichi yakunlangach Namangandan parvozlarni amalga oshirish boshlanadi.

Shundan so‘ng, Uzbekistan Airways uchinchi bosqichga — Farg‘ona shahridan parvozlar sonini ko‘paytirish, shuningdek Farg‘ona xalqaro aeroportidan yo‘nalish tarmog‘ini kengaytirishga o‘tadi. Shu bilan birga, Farg‘onadan parvozlar faqat klassik (biznes va iqtisodiy sinflar) aviaqatnovlar asosida tashkil etiladi.

• Farg‘ona
• Namangan
• Uzbekistan airways